AZƏRBAYCAN RESPUBLİKASI VƏ TACİKİSTAN RESPUBLİKASI ARASINDA BİRGƏ BƏYANNAMƏ
Bundan sonra “Tərəflər” adlandırılan Azərbaycan Respublikası və Tacikistan Respublikası,
Azərbaycan Respublikası və Tacikistan Respublikası arasında ənənəvi dostluq münasibətlərinin hərtərəfli inkişaf etdirilməsi əzmində olaraq,
Azərbaycan və Tacikistan arasında əməkdaşlığın Avrasiyada sülhün və sabitliyin möhkəmləndirilməsinə töhfə verəcəyini qeyd edərək,
Düşənbə şəhərində 15 mart 2007-ci il tarixində imzalanmış “Azərbaycan Respublikası və Tacikistan Respublikası arasında dostluq və əməkdaşlıq haqqında Müqavilə”nin iki ölkə arasında münasibətlərin inkişaf etdirilməsində başlıca rol oynadığını nəzərə alaraq,
beynəlxalq münasibətlərin hazırkı inkişafı kontekstində ikitərəfli siyasi dialoqun əhəmiyyətini vurğulayaraq,
qarşılıqlı maraq kəsb edən mühüm və aktual beynəlxalq məsələlərdə eyni mövqedən çıxış edərək,
iki dövlət arasında dostluq münasibətlərinin möhkəmlənməsinə hərtərəfli səylərini davam etdirərək,
regionda mövcud münaqişələrin sülh yolu ilə həll edilməsində qarşılıqlı səylərini birləşdirmək qətiyyətlərini ifadə edərək,
müxtəlif beynəlxalq və regional təşkilatlar çərçivəsində iki ölkə arasında əməkdaşlığın əhəmiyyətini vurğulayaraq,
enerji təhlükəsizliyinin təmin edilməsində hər iki dövlətin mühüm rol oynadığını nəzərə alaraq,
hər iki dövlətin potensialına uyğun olaraq Azərbaycan və Tacikistan arasında siyasi, iqtisadi, humanitar, mədəni və s. əlaqələrin daha da inkişaf etdirilməsinin zəruriliyini qeyd edərək,
aşağıdakıları bəyan etdilər:
Tərəflər iki dost ölkə arasında hərtərəfli münasibətlərin möhkəmləndirilməsində müxtəlif səviyyələrdəki siyasi dialoqun mühüm əhəmiyyətini qeyd edirlər. Onlar hökumətlər, parlamentlər və vətəndaş cəmiyyəti səviyyələrində mübadilənin genişləndirilməsini alqışlayırlar.
Tərəflər ikitərəfli əlaqələrin qanunun aliliyi, demokratiya, insan hüquqları və bazar iqtisadiyyatı prinsipləri əsasında inkişaf etdirilməsində qətiyyətli olduqlarını vurğulayırlar.
Tərəflər iki ölkə arasında iqtisadi, elmi-texniki, mədəni, humanitar və s. sahələrdə əməkdaşlığın möhkəmləndirilməsi səylərində qətiyyətlidirlər.
Tərəflər qarşılıqlı fayda əsasında iki ölkənin müəssisələri arasında müxtəlif sahələrdə əməkdaşlığı təşviq edəcəklərinə razılaşdılar.
Tacikistan tərəfi Azərbaycan tərəfinin Tacikistan Respublikasında Azərbaycan Respublikasının səfirliyinin açılması niyyətini alqışlayır və Azərbaycan tərəfinin bu addımının iki dost ölkə arasında qarşılıqlı faydalı əlaqələrin daha da möhkəmlənməsinə xidmət edəcəyinə əminliyini ifadə edir.
Tərəflər Şərq-Qərb nəqliyyat dəhlizinin uğurlu fəaliyyət göstərməsində, Xəzər dənizi vasitəsilə birgə nəqliyyat və enerji layihələrinin həyata keçirilməsində bu sahədə mövcud potensialdan istifadə etməklə Azərbaycan və Tacikistan arasında daha sıx qarşılıqlı fəaliyyətin zəruriliyinə öz əminliklərini ifadə etdilər.
Tərəflər Avropa və Asiya arasında nəqliyyat-kommunikasiya əlaqələrinin inkişafı və yük daşımalarının genişləndirilməsini regional əməkdaşlığın prioritet məsələsi hesab edir və bununla əlaqədar olaraq yeni birbaşa birləşdirici dəmiryolu xətlərinin yaradılmasının vacibliyini qeyd edirlər.
Tərəflər beynəlxalq tanınmış sərhədlərin zorla dəyişdirilməsi məqsədilə güc tətbiq etmək və ya güc tətbiq etməklə hədələməyin yolverilməz və qəbuledilməz olmasına dair öz mövqelərini təsdiq edərək, təcavüz aktlarına, dövlətlərin suverenliyinə və ərazi bütövlüyünə yönəlmiş hərəkətlərə qarşı beynəlxalq birliyin səylərinin birləşdirilməsinin qlobal təhlükəsizliyin təmin edilməsində mühüm amil olduğunu bildirirlər.
Tərəflər Ermənistan-Azərbaycan münaqişəsinin nəticələrinin aradan qaldırılması, o cümlədən qaçqın və məcburi köçkün məsələsinin həlli məqsədilə regional və beynəlxalq səylərin artırılmasının zəruriliyini qeyd edirlər.
Tərəflər BMT-nin Təhlükəsizlik Şurasının və İslam Konfransı Təşkilatının müvafiq qətnamələrini, habelə ATƏT-in Lissabon Sammitinin üç prinsipini tam dəstəkləyərək, Ermənistan-Azərbaycan, Dağlıq Qarabağ münaqişəsinin dövlətlərin suverenliyi, ərazi bütövlüyü və sərhədlərin toxunulmazlığı əsasında sülh yolu ilə həll edilməsinin vacibliyini qeyd edirlər.
Onlar bu münaqişənin sülh yolu ilə tezliklə həll edilməsi məqsədilə ATƏT-in Minsk qrupu tərəfindən təsirli və qətiyyətli addımların atılmasının vacibliyini qeyd edirlər.
Beynəlxalq terrorizm, ekstremizmin bütün növləri və təcavüzkar separatizm, narkotik vasitələrin, psixotrop maddələrin və onların prekursorlarının qeyri-qanuni dövriyyəsi, transmilli mütəşəkkil cinayətkarlıq, insan və qanunsuz silah alveri, kütləvi qırğın silahlarının yayılması kimi beynəlxalq təhlükəsizlik və sabitliyə təhlükə törədən ümumi təhdidləri pisləyir və onlara qarşı mübarizədə beynəlxalq səylərin artırılması zəruriliyindən çıxış edirlər.
Tərəflər Müstəqil Dövlətlər Birliyi çərçivəsində qarşılıqlı əlaqələrinin inkişaf etdirilməsinə öz maraqlarını qeyd edir və ümid edir ki, 2007-ci ilin oktyabr ayında Düşənbə şəhərində keçiriləcək MDB dövlət başçıları Şurasının növbəti iclası bunun üçün lazımi təkan verəcəkdir.
Tərəflər Avratlantik Tərəfdaşlıq Şurası və NATO-nun “Sülh Naminə Tərəfdaşlıq” Proqramı çərçivəsindəki əməkdaşlığın vacibliyini və regionda təhlükəsizliyin və sabitliyin möhkəmləndirilməsində əhəmiyyətini qeyd edirlər.
Tərəflər yüksək səviyyəli görüşlərin iki ölkə arasında hərtərəfli əməkdaşlığın inkişafında müsbət və mühüm rol oynadığını məmnunluqla qeyd edirlər. Tərəflər mövcud təcrübə çərçivəsində dostluq əlaqələrinin dərinləşdirilməsi məqsədilə siyasi və iqtisadi məsləhətləşmələrin, regional və qlobal təhlükəsizliyin möhkəmləndirilməsinə yönələn dialoqların və qarşılıqlı maraq doğuran digər məsələlər ətrafında fikir mübadiləsinin həyata keçirilməsinə gələcəkdə də dəstək verəcəklər.
Tərəflər bu Birgə Bəyannamənin Azərbaycan və Tacikistan arasındakı ikitərəfli münasibətlərin intensivləşdirilməsinə və hərtərəfli inkişafına xidmət edəcəyinə əminliklərini ifadə etdilər.
Bakı, 13 avqust 2007-ci il.
Bölmənin digər xəbərləri
