Azərbaycan Rəssamlar İttifaqında Əli Seyran İmanzadənin əsərləri nümayiş olunur
Bakı, 2 sentyabr, AZƏRTAC
Azərbaycan Rəssamlar İttifaqının Vəcihə Səmədova adına sərgi salonunda Əli Seyran İmanzadənin fərdi sərgisinin açılışı olub. Sərgi sentyabrın 5-dək davam edəcək.
AZƏRTAC xəbər verir ki, açılış mərasimində Azərbaycan Rəssamlar İttifaqının sədri Xalq rəssamı, professor Fərhad Xəlilov sərgi haqqında ətraflı məlumat verib, Əli Seyran İmanzadənin yaradıcılığının bədii əhəmiyyətini qeyd edib.
Bildirilib ki, Əli Seyran İmanzadə əsasən fovizm, kubizm və orta əsr Azərbaycan miniatürünün müasir yozumu üslubunda çalışan Azərbaycan rəssamıdır. O, Azərbaycanda təsviri sənət sahəsində peşəkar rəssamlıq təhsili alıb. Yaradıcılıq fəaliyyəti dövründə son 24 il ərzində Avropada yaşayıb və çalışıb. Yaradıcılığı Fransa (Dransi) və Belçika (Brüssel) ilə bağlıdır. Rəssam daha çox, ilk növbədə, mənzərə, interyer və portret janrlarında yaratdığı orijinal fovist və kubist əsərləri ilə tanınır.
Onun əsərlərində həndəsi formaların, parlaq rəng kontrastlarının və XX əsrin əvvəllərinin klassik avanqardının güclü təsiri hiss olunur. İmanzadənin əsərləri beynəlxalq platformalarda fəal şəkildə nümayiş etdirilir. Onun əsərləri Parisdə, o cümlədən tanınmış “Beauté Du Matin Calme” qalereyasında keçirilən sərgilərdə nümayiş olunub, həmçinin iri mədəniyyət layihələri, məsələn, Fransada Azərbaycan incəsənətinin təqdimatları çərçivəsində də sərgilənib.
Əli Seyran İmanzadənin əsərlərinin kompozisiya xüsusiyyətləri orta əsr Azərbaycan miniatürü ilə Qərbi Avropa avanqardının (kubizm və fovizmin) kəsişməsində yaranır. Onun silsilə və yaradıcılıq metodu əsasında müəllif kompozisiyalarının bəzi xüsusiyyətlərini qeyd etmək olar. İlk növbədə, Şərq miniatürü ilə kubizmin sintezi diqqəti çəkir. Rəssam Şərq miniatürünün ənənəvi dilini müasir vizual düşüncə prizmasından keçirərək incəliklə yenidən mənalandırır. Onun kompozisiyaları miniatürdən dekorativliyi, poetikliyi və təhkiyə xarakterini, kubizmdən isə sərt strukturu və həndəsiliyi mənimsəyir.
Bundan əlavə, formanın həndəsiləşdirilməsi və dekonstruksiyasını qeyd etmək lazımdır. İmanzadə insan bədənlərinin, sifətlərin və ətrafdakı əşyaların həcmlərini müstəvilərə, üçbucaqlara və trapesiyalara ayırır. Çoxsaylı rakurslar onun kətanlarında obyektin çox vaxt eyni anda bir neçə baxış nöqtəsindən göstərilməsi ilə ifadə olunur ki, bu da analitik kubizm üçün xarakterikdir, lakin bununla yanaşı, obyektin tanınan silueti qorunub saxlanılır.
Klassik perspektivdən imtina edilməsi hesabına məkanın müstəvi üzərində qurulmasını da qeyd etmək lazımdır. Arxa və ön planlar çox vaxt vizual olaraq bir-birinə qovuşaraq vahid ornamentli xalça təsiri yaradır. Fi¬qurlar sanki pazlın elementlərinə çevrilir. Personajlar və kompozisiyanın elementləri bir-birinə sıx şəkildə uyğunlaşdırılaraq kətanın demək olar ki, bütün səthini doldurur və mozaik quruluş formalaşdırır.
Rəng dinamikası və kompozisiya ritmi yalnız xətlərlə deyil, həm də parlaq, təmiz rənglərin kontrastı ilə müəyyən edilir. Lokal rəng ləkələri aydın konturlarla əhatələnir ki, bu da ilk baxışda statik görünən süjetin daxilindəki daxili gərginliyi və ekspressiyanı gücləndirir. Bununla yanaşı, İmanzadənin kompozisiyaları tarazlığı ilə səciyyələnir. Onun təsvir etdiyi insan fiqurları sükut və təfəkkür aləminə qərq olur, nəticədə dinamik həndəsi formalar harmoniya, poetiklik və meditativ xarakter qazanır.
Bölmənin digər xəbərləri
