Azərbaycan seysmoloqları daha bir uğur qazanmışlar
Bakı, 15 mart (AZƏRTAC). Azərbaycan Milli Elmlər Akademiyası (AMEA) Respublika Seysmoloji Mərkəzi telemetrik peyk rabitəsi ilə işləyən seysmik stansiyaların istifadəsi sahəsində daha bir uğur qazanmışdır.
AMEA Respublika Seysmoloji Xidmət Mərkəzinin (RSXM) mətbuat xidmətindən AZƏRTAC-a bildirmişlər ki, telemetrik stansiyaların alınıb-quraşdırılması və tətbiqi sahəsində MDB ölkələri arasında liderlik edən RSXM ABŞ-ın “Kinemetriks” şirkətinin razılığı ilə başqa ölkələrdə də bu stansiyaların quraşdırılması prosesində iştirak edir.
Razılaşmaya əsasən, regionda və Mərkəzlə əlaqələri olan ölkələrdə telemetrik seysmik stansiyaların quraşdırılması RSXM-ın əməkdaşları tərəfindən həyata keçirilir.
Hazırda RSXM-in episentral şöbəsinin müdiri H.Tağıyev və zəlzələlərin tədqiqat bürosu şöbəsinin əməkdaşı V.Fərəcov Birləşmiş Ərəb Əmirliklərində səfərdədirlər.
Səfər çərçivəsində Azərbaycan seysmoloqlarının Abu-Dabidə yeni telemetrik peyk rabitəsi ilə işləyən seysmik stansiyaların quraşdırılması prosesində iştirakı, həmçinin stansiyaların iş prinsipi ilə bağlı yerli mütəxəssislərə təlim-treninqlərin keçirilməsi nəzərdə tutulur.
Bölmənin digər xəbərləri
