Azərbaycan Universitetində “Cəfər Cabbarlı irsi” mövzusunda tədbir keçirilib
Bakı, 16 aprel, AZƏRTAC
Azərbaycan Universitetində Humanitar və sosial elmlər fakültəsinin Tələbə Elmi Cəmiyyətinin (TEC) təşəbbüsü və təşkilatçılığı ilə “Cəfər Cabbarlı irsi” mövzusunda tədbir keçirilib.
Universitetdən AZƏRTAC-a bildirilib ki, tədbirin qonağı Azərbaycan ədəbiyyatının görkəmli nümayəndəsi, böyük şair, yazıçı və dramaturq Cəfər Cabbarlının nəvəsi, Cəfər Cabbarlının ev-muzeyinin direktoru Qəmər Seyfəddin qızı Bağırova olub.
Tədbirdə Cəfər Cabbarlının milli ədəbiyyatın, dramaturgiyanın, teatr və kino sənətinin inkişafındakı xidmətlərindən bəhs olunub, əsərlərindən poetik nümunələr səsləndirilib. Tədbir çərçivəsində universitetdə Cəfər Cabbarlının həyat və yaradıcılığından bəhs edən sərgi təşkil olunub.
TEC-in sədri Solmaz İlyaszadə açılış nitqi ilə çıxış edərək tələbələrə Cəfər Cabbarlının həyat və yaradıcılığı haqqında yığcam məlumat verib. TEC üzvü tələbələrdən Aqil Məmmədov “Ana”, Cansu Nəzərova isə “Azərbaycan Bayrağına” şeirini səsləndiriblər.
Daha sonra elmi işlər üzrə prorektor Yusif Qasımov, Humanitar və sosial elmlər fakültəsinin dekanı Səfər Məmmədov, universitetin qonağı, “Diaspor Fəaliyyətinə Jurnalistlərin Dəstəyi” İctimai Birliyinin sədri Fuad Hüseynzadənin çıxışları dinlənilib. Çıxışlarda qeyd olunub ki, şair, yazıçı, dramaturq, teatr və kino xadimi, tərcüməçi, rejissor və kinossenariçi, böyük maarifçi Cəfər Cabbarlının adı Azərbaycanın fikir tarixinə və ədəbiyyatına qızıl hərflərlə yazılıb. Cəmi 35 il yaşamasına baxmayaraq zəngin, çoxşaxəli və olduqca məhsuldar yaradıcılıq yolu keçib. Yaradıcılığa şeirlə başlasa da, ən məşhur və ən gözəl əsərlərini dram janrında yazıb. Əsərləri dövrün mühüm ictimai məsələlərinə həsr olunub və oxucunu yenilik və müasirlik uğrunda mübarizəyə səsləyib, bu çağırışlar indi də aktuallığını qoruyub saxlayır.
Tədbirin qonağı Qəmər Bağırova çıxışında Cəfər Cabbarlının ailəsi və ev-muzeyinin kollektivi adından Azərbaycan Universitetinin rəhbərliyinə və tədbirin təşkilatçılarına təşəkkür edib. Cəfər Cabbarlının həyat və yaradıcılığının bilinməyən məqamlarına toxunan qonaq qeyd edib ki, sovet dövründə onun haqqında bəzi faktlar gizlədilib, əsərlərinin bir qismi qəsdən yox edilib, itirilib, təhrif, yaxud ixtisarla çap olunub. Rus dilində yazılan və tərcümə olunmayan, həmçinin indiyə qədər tədqiq olunmayan əsərləri də var. Onu sovet yazıçısı kimi təqdim etsələr də, əslində sovet rejimi ilə barışmayıb və qəbul etməyib. Yaradıcılığının mühüm bir hissəsini türkçülük ideyalarının təbliğinə, Azərbaycanın istiqlaliyyətinin tərənnümünə həsr edən görkəmli fikir adamı təzyiqlərə məruz qalıb, amma onu sındıra bilməyiblər.
Qəmər Bağırova vurğulayıb ki, Cəfər Cabbarlının irsi aktualdır, sevilir və öyrənilir. Azərbaycan dövləti Cəfər Cabbarlının zəngin yaradıcılığını hər zaman yüksək qiymətləndirib. 2019-cu ildə Prezident İlham Əliyevin Sərəncamı ilə anadan olmasının 120 illiyi silsilə tədbirlərlə qeyd olunub.
Qəmər Bağırova tələbələrin Cəfər Cabbarlının həyat və yaradıcılığına dair ünvanladıqları çoxsaylı sualları da cavablandırıb.
Bölmənin digər xəbərləri
