Azərbaycan və Finlandiya alimləri birgə elmi fəaliyyətlə bağlı razılığa gəliblər
Bakı, 8 sentyabr, AZƏRTAC
Finlandiyanın Helsinki Universitetinin Aleksanteri İnstitutunun direktoru Markku Kanqaspuro və institutun professoru, tarix elmləri doktoru Dmitri Frolov AMEA-nın Fəlsəfə və Sosiologiya İnstitutunda olublar.
Bu barədə AZƏRTAC-a Fəlsəfə və Sosiologiya İnstitutundan bildirilib. Qeyd olunub ki, müəssisənin direktoru professor İlham Məmmədzadə qonaqlara institutun elmi fəaliyyəti və aparılan elmi-tədqiqat işləri ilə bağlı ətraflı məlumat verib.
Qonaqlar isə Azərbaycanda aparılan tədqiqatlardan və Aleksanteri İnstitutunun Rusiya, Şərqi Avropa və Avrasiya üzrə həyata keçirdiyi milli və beynəlxalq layihələrdən danışıblar. İnstitutun sosial və humanitar elmlər sahəsində tədqiqatlar apardığını, həm ölkə daxilində, həm də beynəlxalq səviyyədə fəal əməkdaşlıq etdiyini diqqətə çatdırıblar.
Görüşün sonunda Fəlsəfə və Sosiologiya İnstitutu ilə Aleksanteri İnstitutunun arasında elmi fəaliyyətin qurulması istiqamətində razılığa gəlindiyi və gələcəkdə bu istiqamətdə memorandum imzalanması planlaşdırılıb.
Bölmənin digər xəbərləri
