Bakı, 19 fevral, AZƏRTAC

Azərbaycan 30 il ərzində Ermənistan tərəfindən dağıdılan, xarabalığa çevrilən, təbii sərvətləri talanan, məhv edilən Qarabağ və Şərqi Zəngəzuru indi yenidən quraraq abadlaşdırır, dolayısı ilə dünyaya barbar və sivil xalqın fərqini anladır. Ermənistan silahlı qüvvələrinin işğalından azad edilən, separatçı-terrorçulardan təmizlənən bu iqtisadi rayonlarımızda həyata keçirilən yeni-yeni layihələr də bunun sübutudur.

Bu fikirləri AZƏRTAC-a açıqlamasında Milli Məclisin deputatı Aydın Hüseynov səsləndirib.

Onun sözlərinə görə, ermənilər işğal etdikləri Azərbaycan torpaqlarında bəşər tarixində misli-bərabəri olmayan vəhşiliklər həyata keçiriblər: “Ermənilərin yerlə-yeksan etdiyi, dünyada “Qafqazın Xirosiması” kimi tanınan Ağdam şəhəri də yenidən inşa edilən yurd yerlərimizdəndir. Azərbaycan Prezidenti, Müzəffər Ali Baş Komandan İlham Əliyevin bölgələrə səfərləri zamanı nümayiş etdirilən foto və videogörüntülər işğaldan azad edilən digər rayonlar kimi, Ağdamın hansı zülmə məruz qaldığını bütün dünyaya nümayiş etdirir.

Prezidentin xarici jurnalistlər üçün təşkil etdiyi mətbuat konfranslarının iştirakçıları, Azərbaycandakı diplomatik korpusun bu ərazilərə səfərlərdə iştirak edən nümayəndələri, Bakıda keçirilən müxtəlif beynəlxalq tədbirlərin qonaqları da erməni vəhşiliyinin şahidi olublar. Azərbaycan dövləti işğal dövründə viran qoyulmuş bu ərazilərə həyatı yenidən qaytarmaqda maraqlıdır və xalqımız dövlətimizin başçısı tərəfindən aparılan bu uğurlu siyasəti dəstəkləyir”.

Aydın Hüseynov qeyd edib ki, işğaldan azad olunmuş ərazilərdə həyata keçirilən bərpa və yenidənqurma prosesində müasir, innovasiyalara əsaslanan təhsil ocaqlarının yaradılmasına xüsusi diqqət göstərilir. Ağdam şəhər 1 nömrəli tam orta məktəbdə aparılan tikinti işləri ilə bağlı dövlətimizin başçısına və birinci xanıma məlumat verilərkən də bildirildi ki, təməli 2021-ci ilin mayında qoyulan məktəbin tikintisinin 2025-ci ildə başa çatdırılması nəzərdə tutulur.

“Ağdam Residence” yaşayış kompleksinin, Ağdam Muğam Mərkəzinin, Ağdam Regional Rəqəmsal İdarəetmə Mərkəzi və Təlim-Tədris Kompleksinin və digər infrastrukturun inşası da görülən işlərdən yalnız bəziləridir. Bütün bunlar bizi çox sevindirir. Bu gün Ağdamda təməlləri qoyulan onlarla yaşayış və qeyri-yaşayış binalarının tikintisi, ölkənin ən böyük sənaye parklarından olan Ağdam Sənaye Parkının fəaliyyətə başlaması da ağdamlıların hədsiz sevincinə səbəb olub”, - deyə o əlavə edib.