AZƏRBAYCANDA 2009-CU İLDƏ KƏND TƏSƏRRÜFATININ İNKİŞAFI SAHƏSİNDƏ BÖYÜK İŞLƏR GÖRÜLMÜŞDÜR
Bakı, 1 yanvar (AZƏRTAC). Azərbaycanda 2009-cu ildə kənd təsərrüfatının inkişafı sahəsində böyük işlər görülmüşdür.
Bu sözləri Prezident İlham Əliyev Yeni il münasibəti ilə Azərbaycan xalqına təbrikində bildirmişdir.
Ötən il Azərbaycanda 3 milyon ton taxıl yığıldığını vurğulayan dövlətimizin başçısı bunun rekord göstərici olduğunu demişdir. Ötən il bütün başqa kənd təsərrüfatı məhsullarının istehsalı üçün də praktiki işlər görülmüş, subsidiyalar, kreditlər verilmiş, soyuducu anbarlar, taxıl anbarları tikilmiş, suvarma tədbirləri görülmüşdür. Yəni, kənd təsərrüfatını daha da inkişaf etdirmək üçün bizim düşünülmüş proqramımız vardır və bunun nəticəsində Azərbaycanda kənd təsərrüfatı məhsulları artır. Biz bu gün özümüzü demək olar ki, əsas kənd təsərrüfatı məhsulları ilə təmin edirik. Gələcəkdə bu, daha da böyük həcmlə təşkil ediləcəkdir. Həm öz daxili tələbatımızı ödəmək üçün, həm də ixrac potensialımızı artırmaq üçün gələcəkdə əlavə imkanlar yaradılacaqdır. Ölkəmiz üçün həm iqtisadi, həm sosial baxımdan çox vacib olan bu sahənin inkişafı kompleks tədbirlər nəticəsində təmin edilir.
Bölmənin digər xəbərləri
