Azərbaycanda Amerika Ticarət Palatası ekologiyaya həsr olunmuş işgüzar görüş keçirib
Bakı, 1 may, AZƏRTAC
Azərbaycanda Amerika Ticarət Palatası ("AmCham Azərbaycan") üzvləri üçün ekologiya və təbii sərvətlər naziri Muxtar Babayevin iştirakı ilə Azərbaycan ekologiyasına həsr olunmuş işgüzar görüş təşkil edib.
"AmCham Azərbaycan"dan AZƏRTAC-a bildirilib ki, tədbirdə diplomatik korpusun nümayəndələri də daxil olmaqla "AmCham"ın 100-dən çox üzvü və tərəfdaşı iştirak edib, bir neçə üzv şirkətin fəaliyyəti və xidmətləri barədə təqdimatlar nümayiş olunub.
Görüşdə M.Babayev ətraf mühitin mühafizəsi, ekoloji tarazlığın qorunması, mövcud ekoloji problemlərin həlli istiqamətində dövlət tərəfindən həyata keçirilən tədbirlər, eyni zamanda, nazirliyin qarşısında duran vəzifələr və mövcud ekoloji problemlərin həlli yolları barədə ətraflı məlumat verib, biznes sektoru nümayəndələri ilə birbaşa görüş imkanına görə Azərbaycanda Amerika Ticarət Palatasına təşəkkürünü bildirib.
Qeyd edək ki, 1996-cı ildə yaradılmış "AmCham Azərbaycan" iqtisadiyyatın hər sektorunda fəaliyyət göstərən 280-dən çox üzv şirkəti özündə birləşdirir. Palata ölkədə bütün xarici investisiyaların təxminən 80 faizini, eləcə də yerli investisiyaların mühüm hissəsini təmsil edir.
Bölmənin digər xəbərləri
