İQTİSADİYYAT
Azərbaycanda eyniləşdirmə fondu fəaliyyətə başlayacaq
Bakı, 11 mart, AZƏRTAC
Startapların maliyyələşdirilməsi üçün İnnovasiya və Rəqəmsal İnkişaf Agentliyi (İRİA) fərqli üsul və yollar nəzərdən keçirir. Bu üsullardan biri mələk investorların daha aktiv və daha fəal rolunu ekosistemin inkişafında dəstəkləməkdir.
Bu barədə AZƏRTAC-a açıqlaması zamanı İRİA-nın İnnovasiya Ekosistemi Departamentinin müdiri Yevgeniya Bikmurzina deyib.
“İnvestorlara hansısa vergi imtiyazı verilməlidir və yaxud dövlət bu investisiyaları ikiqat artırmalıdır. Yaxın ölkələrin analoji təcrübələrini nəzərə alaraq belə bir mexanizm fikirləşmişik ki, mələk investor qoyduğu hər bir investisiyanın eyni həcmini dövlət eyniləşdirsin. Yəni hansısa bir mələk investor, hər hansı bir startapa 5 min manat yatırmaq istəyirsə, dövlət də o 5 min manatı həmin startapa yatıracaq”, - deyə departament müdiri bildirib.
O qeyd edib ki, fondun fəaliyyətə bu il başlaması gözlənilir: “Hazırda fondun icraçı direktoru vəzifəsinə namizəd axtarılır. İcraçı direktor müəyyənləşdikdən sonra fondun elanını yaxın zaman da bölüşəcəyik. Ümumiyyətlə hazırda dövlətin startaplara yatırdığı investisiyaların geri qayıtması gözlənilmir. Bu investisiyaların dövlətə qaytarılması 3, 5 bəzən isə 8 ilədək vaxt ala bilər”, - deyə Y.Bikmurzina əlavə edib.