Azərbaycanda ilk dəfə Cəlilabad rayonunda noxud bitkisi üzrə sığorta ödənişi edilib
Bakı, 18 mart, AZƏRTAC
Aqrar Sığorta Fondu Cəlilabad rayonunda ilk dəfə olaraq noxud əkini sahəsi üzrə sığorta ödənişi edib.
Fonddan AZƏRTAC-a bildirilib ki, sığorta ödənişi “Tale-94” Müstəqil Kiçik Müəssisəsinin Cəlilabad rayonunun Gülməmmədli kəndindəki noxud əkini sahələri üzrə həyata keçirilib. Vəhşi heyvanların – çöl donuzlarının hücumu nəticəsində ümumi ərazisi 17 hektar olan əkin sahəsinin bir hissəsinə zərər dəyib.
Fermerin Aqrar Sığorta Fonduna müraciəti əsasında əraziyə baxış üçün müstəqil aqrar sığorta eksperti təyin edilib, ekspert tərəfindən hadisə araşdırılıb, dəymiş zərər hesablanıb.
Aparılan hesablama nəticəsində fermerə dəymiş zərərə görə 8801 manat məbləğində ödəniş həyata keçirilib. Noxud əkini sahəsini könüllü sığortalayan fermer bunun üçün 262 manat sığorta haqqı ödəmişdi.
Fermerə sığorta ödənişi barədə simvolik çek Cəlilabad rayonunda keçirilən Aqrar İnnovasiya Festivalı çərçivəsində kənd təsərrüfatı naziri Məcnun Məmmədov, Cəlilabad Rayon İcra Hakimiyyətinin başçısı Rafiq Cəlilov və Aqrar Sığorta Fondunun Cəlilabad filialının rəhbəri Rafət Əsgərov tərəfindən təqdim edilib.
Təsərrüfatın rəhbəri, “Tale-94” Müstəqil Kiçik Müəssisəsinin direktoru Dayandur Əliyev təsərrüfatına dəymiş zərərin qarşılanmasında aqrar sığorta mexanizminin fəaliyyətindən razı qaldığını bildirib: “Noxud əkinləri rayonumuzda geniş yayılıb və bizim təsərrüfatımız da bitki əkini ilə məşğuldur. Əkin sahəsini çoxsaylı risklərdən, xüsusilə də vəhşi heyvanların hücumundan qorumaq üçün ötən il Aqrar Sığorta Fondunda sığortalamışdıq və bu məqsədlə 262 manat sığorta haqqı ödəmişdik. Aqrar sığorta sisteminin işindən və bizə ödənilən sığorta ödənişindən çox razıyıq”.
Aqrar Sığorta Fondunun Cəlilabad regional filialının rəhbəri Rafət Əsgərov qeyd edib ki, Cəlilabad rayonunda iqlim nisbətən sakit, təbiət hadisələri isə az olsa da, dolu, fırtına, sel-subasma, eyni zamanda, vəhşi heyvanların hücumu kimi hallar mütəmadi baş verir.
Filial rəhbəri bildirib ki, indiyədək Aqrar Sığorta Fondu tərəfindən Cəlilabadda 130 min manata yaxın ödəniş həyata keçirilib. Sığorta ödənişləri arpa, buğda və noxud sahələrinə, dolu, fırtına, sel-subasma, bitki xəstəlikləri və ziyanvericilər, vəhşi heyvanların hücumu hadisələri üzrə edilib.
Xatırladaq ki, Azərbaycanda dövlət dəstəyi ilə təqdim olunan aqrar sığorta mexanizmi vasitəsilə ümumilikdə 41 bitki və bitki məhsullarını sığortalamaq mümkündür. Fermerlərə dəstək məqsədilə sığorta haqının yarısını dövlət ödəyir. Nəticədə aqrar sığorta fermerlər üçün olduqca əlçatandır. Belə ki, Cəlilabad rayonunda 1000 manatlıq buğda məhsulunun sığortası fermerə 6,65 manata, arpa məhsulu 8,35 manat, kartof məhsulu 6,4 manata başa gəlir. 1000 manatlıq günəbaxanı sığorta etmək üçün cəmi 7 manat, üzümün sığortası 10 manat, çiyələyin sığortası üçün isə 14,7 manat ödəniş tələb olunur.
Aqrar Sığorta Fondu tərəfindən fermer və təsərrüfatlara indiyədək 23 milyon manat sığorta ödənişi edilib. Təkcə 2025-ci ildə Aqrar Sığorta Fondu 54 rayonda sığorta ödənişləri həyata keçirib.
Fond baş verə biləcək hadisələr və zərərlərdən qorunmaq üçün fermerləri öz əkin sahələrini vaxtında sığortalamağa çağırır. Sığortalanma prosesini asanlaşdırmaq üçün isə fermerlərin sığorta ödənişini “AsanPay” sistemi vasitəsilə, mobil telefonla ödəməsi imkanı yaradılıb.
Aqrar sığortanın əhatə etdiyi məhsullarının sığorta şərtləri və tarifləri ilə Aqrar Sığorta Fondunun rəsmi internet səhifəsində “Bitkiçilik məhsulları” bölməsində ətraflı tanış olmaq, sığorta haqqını isə “Bitkiçilik kalkulyatoru” vasitəsilə hesablamaq mümkündür. Əlavə məlumatları ASF-nin sosial şəbəkə hesablarını izləməklə və 1651 nömrəsi ilə əlaqə saxlamaqla əldə etmək olar.
Bölmənin digər xəbərləri
