AZƏRBAYCANDA İNSAN ALVERİNƏ QARŞI MÜBARİZƏ ÖZ BƏHRƏSİNİ VERİR
İyunun 27-dən iyulun 6-dək ukraynalı ekspertlər bu sahədə fəaliyyət göstərən ictimai birliklərin 17 nümayəndəsinə təlim keçmişlər.
İyulun 7-də BMqT-nın ölkəmizdəki nümayəndəliyində keçirilən mətbuat konfransında ABŞ-ın Azərbaycandakı səfirliyinin ictimaiyyətlə əlaqələr üzrə attaşesi Conatan Henik bildirmişdir ki, təlimdən məqsəd insan alverinə qarşı mübarizənin gücləndirilməsi üçün əhalini maarifləndirmək, habelə insan alverinin qurbanı olmuş şəxslərə yardım etməkdir. Onun sözlərinə görə, iş, təhsil, yaşamaq və s. məqsədi ilə xaricə getmək istəyən şəxslər bir çox hallarda aldadılırlar.
İnsan alverinə qarşı mübarizədə ABŞ-ın Azərbaycan hökuməti ilə əməkdaşlıq etdiyini bildirən C.Henik, ölkəmizdə bu problemin həlli üçün yaxşı qanunvericilik bazasının və iş planının olduğunu diqqətə çatdırmışdır.
Ölkəmizdə insan alverinə qarşı mübarizənin bəhrəsini verdiyini qeyd edən C.Henikin sözlərinə görə, ABŞ Dövlət Departamentinin ötən il üçün dünya ölkələrində insan alveri ilə bağlı hesabatında göstərilmişdir ki, Azərbaycanda bu sahədə vəziyyət əvvəlki illə müqayisədə xeyli yaxşılaşmışdır. ABŞ hökuməti yerli mütəxəssislərə təlim keçmək məqsədi ilə 350 min dollar vəsait ayırmışdır.
Ukraynalı ekspertlər təlimdə tədris olunmuş məsələlərdən söz açmış, insan alverinə qarşı mübarizə məqsəd ilə yaradılacaq “qaynar xətt”in iş prinsipi haqqında məlumat vermişlər.
