Azərbaycanda milli atüstü oyunlar getdikcə daha kütləvi xarakter alır
Şəki, 20 dekabr, Mustafa Dadaşov, AZƏRTAC
Şəki rayonunda Atçılıq Turizm Mərkəzi Azərbaycan Prezidenti İlham Əliyevin müvafiq Fərmanı ilə 2006-cı ildə yaradılıb. 2007-ci ildən isə bu qurum Respublika Atçılıq Turizm Mərkəzinə çevrilib. Həmin vaxtdan başlayaraq hər il burada may ayında ümummilli lider Heydər Əliyevin xatirəsinə həsr olunan milli atüstü oyunlar festivalı, dekabrda isə Prezident Kuboku uğrunda çövkən milli oyunu üzrə yarışlar keçirilir. Çox sevindirici haldır ki, UNESCO-nun Qeyri-Maddi Mədəni İrsin Qorunması üzrə Hökumətlərarası Komitəsinin ötən ilin dekabrında Bakıda keçirilən 8-ci sessiyasında Azərbaycanın çövkən oyununun UNESCO-nun Təcili Qorunmaya Ehtiyacı olan Qeyri-Maddi Mədəni İrs Siyahısına salınmasından sonra ölkəmizdə milli atüstü oyunlar getdikcə daha kütləvi xarakter alır, yarışlar daha maraqlı keçir.
Bu sözləri Respublika Atçılıq Turizm Mərkəzinin direktoru Elman Qədirov Şəkidə AZƏRTAC-ın müxbirinə eksklüziv müsahibəsində deyib.
Mərkəzin direktoru bildirib ki, hazırda burada 100-ə yaxın at bəslənilir. Bu atlar əsasən ərəb, yerli, türkmən cinsi olan “Axaltəkə”, həmçinin təmiz qanlı ingilis atları və onların mələzləridir. Bu atlara yüksək səviyyədə qulluq olunur, hər il onlardan bala alınır. Mərkəzdə saxlanılan atlardan əsasən milli atüstü yarışlarda, həmçinin turist gəzintilərində istifadə olunur.
Elman Qədirov bildirib ki, milli atüstü oyunlarda iştirak edən komandaların ustalıq səviyyəsi də get-gedə artır, yarışlar daha gərgin keçir, komandalar arasında ciddi rəqabət yaranıb. Bunun nəticəsidir ki, oyunların baş mükafatına - Prezident Kubokuna iddialı komandaların sayı da ildən-ilə artır.
Mərkəzin direktoru xalqımızın qədim atçılıq ənənələrinin bərpasına və dirçəldilməsinə həssaslıqla yanaşdıqlarına görə yarış iştirakçıları adından Azərbaycan dövlətinin başçısı İlham Əliyevə və Heydər Əliyev Fondunun prezidenti, UNESCO-nun və İSESCO-nun xoşməramlı səfiri Mehriban xanım Əliyevaya dərin minnətdarlığını bildirib.
Bölmənin digər xəbərləri
