Azərbaycanda mina təhlükəsi ilə mübarizədə birgə səylərin əhəmiyyəti vurğulanıb - Panel sessiya
Bakı, 2 sentyabr, AZƏRTAC
Bakıda keçirilən IV Beynəlxalq Minatəmizləmə Konfransı çərçivəsində "Azərbaycanda mina təhlükəsi ilə mübarizə vasitəsilə təhlükəsiz bərpaya dəstək üçün beynəlxalq əməkdaşlıq və donor mexanizmləri" mövzusunda panel sessiya təşkil olunub.
AZƏRTAC xəbər verir ki, Mayorka üzrə senator, İspaniya Senatı, ATƏT Parlament Assambleyasının Prezidenti Pere Joan Pons Sampeitronun moderatorluğu ilə keçirilən panel müzakirədə Azərbaycanın xarici işlər nazirinin müavini Samir Şərifov, ASEAN Regional Minalarla Mübarizə Mərkəzinin icraçı direktoru Rothna Buth, Birləşmiş Millətlər Təşkilatının Layihə Xidmətləri Ofisinin Avropa və Mərkəzi Asiya üzrə Regional direktoru Tim Lardner, Avropa Komissiyasının Xarici Siyasət Alətləri üzrə Xidmətinin Regional proqram meneceri Arturo Rodriguez Tonelli, İtaliyanın Xarici İşlər və Beynəlxalq Əməkdaşlıq Nazirliyinin Humanitar məsələlər üzrə direktoru Gianluca Brusco çıxış ediblər.
Panel sessiyada Azərbaycanda mina təhlükəsinin aradan qaldırılması və təhlükəsiz bərpa prosesinin dəstəklənməsində beynəlxalq əməkdaşlığın və donor mexanizmlərinin rolu müzakirə olunub. Mina təhlükəsinin miqyası, uzunmüddətli və dayanıqlı maliyyələşmənin əhəmiyyəti, donorlar və beynəlxalq tərəfdaşlar arasında koordinasiyanın gücləndirilməsi, eləcə də mina təhlükəsi ilə mübarizə fəaliyyətinin humanitar məqsədlərlə yanaşı, sosial-iqtisadi inkişaf və təhlükəsiz qayıdış prosesinə töhfəsi diqqətə çatdırılıb.
Müzakirələr zamanı Azərbaycanda həyata keçirilən mina təhlükəsi ilə mübarizə fəaliyyətinin beynəlxalq əməkdaşlıq üçün yaratdığı imkanların, donor dəstəyinin daha effektiv istiqamətləndirilməsi və mina təhlükəsindən azad edilmiş ərazilərdə təhlükəsiz və dayanıqlı bərpanın təmin olunması üçün birgə səylərin əhəmiyyəti vurğulanıb. Sessiyada, həmçinin beynəlxalq həmrəyliyin və tərəfdaşlığın mina təhlükəsinin aradan qaldırılması üzrə qlobal səylərin gücləndirilməsində mühüm amil olduğu qeyd edilib.
Qeyd olunub ki, humanitar minatəmizləmə sahəsində uzunmüddətli beynəlxalq tərəfdaşlıqlar milli potensialın gücləndirilməsi və dayanıqlı nəticələrin əldə olunması üçün əsas şərtdir. Donor təşkilatlarının əlaqələndirilmiş maliyyə və texniki dəstəyi humanitar minatəmizləmə proqramlarının səmərəliliyini və davamlılığını artırır. Humanitar minatəmizləmənin postmünaqişə dövründə bərpa və inkişaf strategiyalarının ayrılmaz tərkib hissəsi kimi qiymətləndirilməsinin vacibliyi, mina təhlükəsinin aradan qaldırılmasının iqtisadi inkişafın sürətləndirilməsi, infrastruktur layihələrinin icrası və insanların təhlükəsiz məskunlaşmasının təmin edilməsi üçün vacib ilkin şərt olduğu diqqətə çatdırılıb. Bildirilib ki, humanitar minatəmizləmə üzrə beynəlxalq standartların və əməliyyat prosedurlarının davamlı təkmilləşdirilməsi təhlükəsizliyin, keyfiyyətin və əməliyyat effektivliyinin artırılmasına xidmət edir. Mina təhlükəsindən azad olunmuş torpaqların təhlükəsiz istifadəyə verilməsi BMT-nin Dayanıqlı İnkişaf Məqsədlərinə nail olunmasına və postmünaqişə cəmiyyətlərinin bərpasına mühüm töhfə verir.
Bölmənin digər xəbərləri
