Azərbaycanda Rusiyanın “Polymedia” şirkətinin nümayəndəliyi açılmışdır
Bakı, 5 noyabr (AZƏRTAC). Noyabrın 5-də Bakıda Rusiyanın “Polymedia” şirkətinin nümayəndəliyinin açılışı olmuşdur. Şirkət dövlət qurumları, təhsil və biznes sahələri üçün audiovizual texnologiyalar bazasında inteqrasiya qərarlarının və layihələrinin işlənib hazırlanması ilə məşğul olacaqdır.
AZƏRTAC xəbər verir ki, şirkətin rəhbəri Yelena Novikova bu münasibətlə noyabrın 5-də keçirilən mətbuat konfransında bildirmişdir ki, Azərbaycanda yeni ofis artıq MDB məkanında üçüncü ofisdir. Onun sözlərinə görə, şirkət dövlət qurumlarının, energetika, nəqliyyat, təhsil sahələrinin və digər sahələrin informasiyalaşdırılması sahəsində layihələr həyata keçirmək niyyətindədir.
“Polimedia-Azərbaycan” ofisinin rəhbəri Rüfət Məmmədov demişdir ki, hazırda şirkətin texnologiyalarının tətbiqinə dair dövlət strukturları ilə danışıqlar aparılır. Onun sözlərinə görə, ilkin mərhələdə bəzi nazirliklərlə müəyyən razılaşma vardır.
“Polymedia” şirkəti dövlət orqanlarının situasion mərkəzləri, enerji şirkətlərinin dispetçer məntəqələri, rəqəmsal məktəblər, distant təhsil sistemləri, multimedia kommunikasiyaları mərkəzləri, biznes-mərkəzlər və s. kimi sahələrdə layihələr həyata keçirir.
Rusiyanın Azərbaycandakı səfiri Vladimir Doroxin təqdimat mərasimində bildirmişdir ki, Azərbaycanda Rusiyanın növbəti şirkətinin açılması ölkələrimiz arasında münasibətlərin inkişafına töhfədir. Səfir bildirmişdir ki, Rusiya ilə Azərbaycan energetika sahəsində fəal əməkdaşlıq edirlər və Rusiya şirkətinin yerli bazara çıxması iqtisadiyyatın digər sahələrində də əlaqələrin olduğuna dəlalət edir.
Tədbirdə “Flipbox” elektron flipçartı, “Teach-Touch” interaktiv displeyi və informasiya-kommunikasiya texnologiyaları sahəsində digər yeniliklər də təqdim olunmuşdur.
Tədbirdə biznes qurumlarının, dövlət müəssisələrinin və QHT-lərin nümayəndələri iştirak etmişlər.
Bölmənin digər xəbərləri
