Azərbaycanın aqrar sığorta təcrübəsi Özbəkistanda da tətbiq ediləcək
Bakı, 4 mart, AZƏRTAC
Azərbaycanda uğurla tətbiq olunan aqrar sığorta mexanizmi təcrübəsindən Özbəkistan da istifadə edəcək. Bu mövzu Kənd Təsərrüfatı Nazirliyinin nümayəndələrinin və Aqrar Sığorta Fondunun rəhbərliyinin Özbəkistan səfəri zamanı diqqət mərkəzində olub.
Kənd Təsərrüfatı Nazirliyinin İctimaiyyətlə əlaqələr və informasiya təminatı şöbəsindən AZƏRTAC-a bildirilib ki, Aqrar Sığorta Fondunun İdarə Heyətinin sədri Fuad Sadıqov və kənd təsərrüfati nazirinin müşaviri Zaur Əliyevin daxil olduğu nümayəndə heyəti Özbəkistanın Kənd Təsərrüfatı və İqtisadiyyat və maliyyə nazirliklərində, eləcə də Özbəkistan Respublikasının Perspektiv Layihələr üzrə Milli Agentliyində görüşlər keçiriblər.
Özbəkistanın İqtisadiyyat və maliyyə nazirinin müavini Axadbek Xaydarov, nazirliyin departament rəhbəri Botir Umonaliyev, eləcə də Kənd Təsərrüfatı Nazirliyinin departament direktorunun müavini İlxom Jurayevlə görüşdə Azərbaycan və Özbəkistan arasında imzalanmış memoranduma əsasən, Azərbaycandakı aqrar sığorta sistemi təcrübəsinin Özbəkistanda tətbiq edilməsinə dair müzakirələr aparılıb.
Aqrar sığorta sahəsində Azərbaycanla Özbəkistan arasında əməkdaşlıq və Azərbaycan təcrübəsinin tətbiqi nümayəndə heyətinin Özbəkistan Respublikasının Perspektiv Layihələr üzrə Milli Agentliyinin sədr müavini Vyacheslav Yurieviçlə keçirilən görüşdə müzakirə edilib.
Xatırladaq ki, Azərbaycanda dövlət dəstəkli aqrar sığorta mexanizminin yaradılmasına Azərbaycan Prezidenti İlham Əliyevin 19 avqust 2019-cu il tarixli fərmanı ilə start verilib. Sözügedən Fərmanla “Aqrar Sığorta haqqında” qanun tətbiq edilib və Aqrar Sığorta Fondu təsis edilib.
Azərbaycanda aqrar sığorta mexanizmi qardaş Türkiyənin Kənd Təsərrüfatı Sığortaları sistemi – TARSİM təşkilatının təcrübəsi və dəstəyi əsasında yaradılıb. Aqrar sığorta sistemi vasitəsilə bitkiçilik, heyvandarlıq və balıqçılıq təsərrüfatlarını çoxsaylı risklərdən, o cümlədən təbii fəlakətlərdən sığortalamaq olar. Qaydalara əsasən fermerlərə dəstək məqsədilə sığorta haqqının 50 faizi dövlət tərəfindən ödənilir.
Fəaliyyətə başladıqdan indiyədək Aqrar Sığorta Fondunun əhatə dairəsi və fəaliyyəti ildən-ilə genişlənməkdədir. Hazırda Aqrar Sığorta Fondu vasitəsilə 447 min hektar və ya ölkədəki bütün əkin sahələrinin təqribən 25 faizi sığortalanır. Fermer və təsərrüfatlara ödənişlər isə sürətlə artaraq 2024-cü ilin nəticələrinə görə, 6,4 milyon manata yüksəlib, bu rəqəmlər hər gün artır.
Azərbaycanın uğurlu aqrar sığorta təcrübəsinin region ölkələrinin də diqqətini cəlb edib və hazırda bu təcrübənin digər ölkələrdə, o cümlədən Özbəkistanda tətbiqi ilə bağlı müzakirələr aparılır.
Aqrar sığorta məhsulları, məhsul şərtləri, təklif olunan sığorta zərfləri, təminat verilən risklər barədə ətraflı məlumatı www.asf.gov.az rəsmi veb-saytından və ya 1651 Çağrı Mərkəzinə müraciət etməklə almaq olar.
Bölmənin digər xəbərləri
