Bakı, 14 fevral, AZƏRTAC

Prezident İlham Əliyevin Davosda Çinin CGTN (China Global Television Network) telekanalına verdiyi müsahibədə “Sizcə çoxqütblü dünyada Azərbaycanın yeri haradadır” sualına cavabı Azərbaycana ikili standartlarla yanaşan və uğurlarımızı həzm edə bilməyənlərə tutarlı cavab idi. Çünki bəzi dairələr Azərbaycanın uğurlarını həzm edə bilmirlər. Onlar ölkəmizə qısqanclıqla yanaşdıqlarından ədalətsiz siyasi təzyiq kampaniyalarına məruz qalırıq.

Dövlətimizin başçısının qeyd etdiyi kimi, “Biz ən başdan, müstəqilliyimiz bərpa ediləndən bəri olduğumuz yerdəyik”. Bəli, bizimlə eyni vaxtda müstəqillik əldə etmiş ölkələrin keçdiyi tarixə və indiki vəziyyətinə baxsaq görərik ki, bir çoxlarında hələ də sabitlik və təhlükəsizlik təmin olunmayıb. Məsələn, Rusiya Ukrayna ilə müharibə vəziyyətindədir, Gürcüstanda hazırda siyasi sabitlik mövcud deyil, Ermənistanda isə hakimiyyət davası ölkənin dalandan çıxmasına imkan vermir... Bununla bağlı çoxsaylı misallar göstərmək mümkündür. Amma Azərbaycan müstəqilliyini qorumaqla yanaşı, onu möhkəmləndirib və dinamik inkişaf edən iqtisadiyyat qura bilib.

Bu sözləri AZƏRTAC-a açıqlamasında Milli Məclisin İqtisadi siyasət, sənaye və sahibkarlıq komitəsi sədrinin müavini Azər Badamov söyləyib.

Onun sözlərinə görə, Azərbaycanın hazırda valyuta ehtiyatları xarici borcunu 14 dəfə üstələyir ki, bu da dünyada çox az ölkələrdə müşahidə olunur. Hətta bu müstəvidə biz özümüzü dünyanın inkişaf etmiş ölkələri ilə müqayisə edə bilirik. Azərbaycan həyata keçirdiyi beynəlxalq layihələrlə Cənubi Qafqazın lokomotiv ölkəsi kimi yerini möhkəmlədib. Belə ki, dövlətimizin başçısının uzaqgörən siyasəti ilə bu gün daha da aktuallaşan Şimal-Cənub və Şərq-Qərb nəqliyyat dəhlizləri, həmçinin ölkəmiz tərəfindən reallaşdırılan Bakı-Tbilisi-Qars (BTQ) dəmir yolu, neft-qaz enerji marşrutları Azərbaycanın dünyadakı mövqeyini daha da gücləndirib. Belə ki, Bakı Beynəlxalq Dəniz Ticarət Limanının yükaşırma gücünü 15 milyon tondan 25 milyon tona çatdırmaq istiqamətində görüləcək işlər, Xəzər Dəniz Neft Donanmasının genişləndirilməsi, BTQ-nin yükdaşıma gücünün 1 milyon tondan 5 milyon tona çatdırılması və Zəngəzur dəhlizinin açılması istiqamətində hədəflərimiz Azərbaycanın geostrateji önəminin göstəricisidir. Çünki qloballaşan dünyada beynəlxalq nəqliyyat marşrutlarına nəzarət edən ölkələr daha üstün mövqeyə malik olurlar.

“Dövlətimizin başçısının qeyd etdiyi kimi, “milli maraqlarımızı, həyat tərzimizi və müstəqil siyasətimizi qəti şəkildə müdafiə etmişik və çoxlu uğur qazanmışıq”. Azərbaycanın öz milli maraqlarını müdafiə edən və bütün dünyada yaxşı əlaqələr quran ölkə kimi nümunəsi onu göstərir ki, cəmiyyətdə sabitlik, birlik varsa, milli maraqlar müdafiə olunur. Belə ki, bu gün Azərbaycan ərazilərini öz gücü ilə işğaldan azad edərək suverenliyini təmin etmiş nadir ölkələrdəndir. Məhz bu böyük qələbəmizin təməlində cəmiyyətdə sabitlik, birlik, öz milli maraqlarını müdafiəetmə qabiliyyəti, iqtisadiyyat və dünyada yaxşı əlaqələr quran ölkə olmaq bacarığı dayanır.

Azərbaycan ədalətli mövqeyini dünya ictimaiyyətinə qəbul etdirməkdədir. Belə ki, Azərbaycan 155 ölkənin dəstəyi ilə BMT Təhlükəsizlik Şurasına qeyri-daimi üzv seçilib və sədrlik edib. Həmçinin 120 ölkənin dəstəyi ilə böyüklüyünə görə BMT-dən sonra ikinci böyük təsisat olan Qoşulmama Hərəkatına 4 ildə sədrlik həyata keçirib. Bundan əlavə, Azərbaycan COP29-a uğurla ev sahibliyi edib və Bakıda ölkələri dünya üçün əhəmiyyətli məsələlərin müzakirəsi üçün bir araya gətirib. Azərbaycan həm də fərqli hərbi qütblərin müzakirələr apardığı etibarlı məkanı kimi qəbul olunur. Ümumilikdə deyə bilərik ki, ərazi və əhalinin sayı baxımından kiçik olmasına baxmayaraq, Azərbaycanın beynəlxalq aləmdəki yeri çox parlaq şəkildə görünür”, - deyə A.Badamov.