Azərbaycanın çoxvektorlu siyasəti Avropada yeni siyasi reallıq formalaşdırır ŞƏRH
Bakı, 10 dekabr, Səbinə Əlizadə, AZƏRTAC
Prezident İlham Əliyevin Slovakiyaya rəsmi səfəri Azərbaycan–Avropa münasibətlərində yeni strateji mərhələnin əsasını qoymaqla yanaşı, iki ölkə arasında dostluq və tərəfdaşlıq əlaqələrinin daha da gücləndirilməsinə xidmət edir. Azərbaycan və Slovakiya arasında ötən il imzalanmış Strateji Tərəfdaşlıq haqqında Bəyannamə münasibətləri ən yüksək səviyyəyə qaldıraraq əməkdaşlıq gündəliyinin bütün sahələr üzrə genişlənməsinə təkan verib.
Bunu AZƏRTAC-a açıqlamasında Milli Məclisin deputatı Ceyhun Məmmədov bildirib.
Deputatın sözlərinə görə, hazırda hər iki ölkənin dövlət qurumları imzalanmış sənədin icrası istiqamətində koordinasiyalı fəaliyyət göstərir, birgə işçi qruplar əməkdaşlıq xəttini genişləndirir: “Xüsusilə enerji sektoru üzrə həyata keçirilən layihələr ikitərəfli tərəfdaşlığın strateji mahiyyətini artırır. Artıq Azərbaycan qazı Slovakiyaya çatdırılır və Slovakiya Azərbaycan qazı ilə təmin olunur. Bununla da Azərbaycanın qaz ixrac etdiyi ölkələrin sayı 14-ə yüksəlib. Bu fakt Azərbaycanın Avropanın enerji təhlükəsizliyində oynadığı həlledici rolu daha da möhkəmləndirir”.
Ceyhun Məmmədov qeyd edib ki, müdafiə sənayesi sahəsində əməkdaşlıq da münasibətlərdə xüsusi yer tutur. Azərbaycanın maliyyə imkanlarının Slovakiya texnologiyaları ilə birləşdirilməsi yeni məhsulların birgə istehsalına, gələcəkdə onların dünya bazarlarına çıxarılmasına zəmin yaradır: ”Prezident İlham Əliyevin də bildirdiyi kimi, Azərbaycan müharibə niyyətində deyil, ölkəmiz yalnız öz müdafiə qabiliyyətini gücləndirməyə çalışır. Müdafiə sənayesində bu formatda əməkdaşlıq hər iki ölkənin maraqlarına cavab verir”.
“Səfər çərçivəsində müzakirə olunan əsas istiqamətlərdən biri də nəqliyyat və tranzit sahəsində inteqrasiyanın genişləndirilməsidir. Azərbaycan Şərq–Qərb və Şimal–Cənub nəqliyyat dəhlizlərinin mühüm iştirakçısı kimi öz infrastruktur imkanlarını ardıcıl şəkildə genişləndirir. Orta Dəhlizin inkişafı, onun Avropa üçün əsas alternativ marşrut kimi qəbul olunması istiqamətində atılan addımlar həm regionun, həm də qlobal logistika xəritəsinin gələcəyinə təsir göstərir,”-deyə deputat vurğulayıb.
Ceyhun Məmmədov bildirib ki, Prezident İlham Əliyevin diqqət çəkdiyi süni intellekt, data mərkəzləri və rəqəmsal əməkdaşlıq sahələri Azərbaycan–Slovakiya münasibətlərində yeni mərhələnin əsas komponentidir: “Azərbaycanın 2 giqavata yaxın sərbəst enerji potensialı, yaxın illərdə bu rəqəmin 8 giqavata yüksəlməsi və ölkəmizin Azərbaycanı regional rəqəmsal hab kimi formalaşdırmaq planları bu sahədə əməkdaşlığa geniş imkanlar yaradır. Rəqəmsal inteqrasiya həm Türk Dövlətləri Təşkilatında, həm də Azərbaycan–Aİ münasibətlərində strateji baxımdan mühüm istiqamət kimi qiymətləndirilir”.
Deputat əlavə edib ki, bu səfər Azərbaycanın Avropa İttifaqında mövqeyinin möhkəmlənməsinə, tərəfdaş ölkələrin sayının artmasına və qərəzli yanaşmaların neytrallaşdırılmasına mühüm töhfə verir:
“Azərbaycan Avropa dövlətləri ilə münasibətlərini genişləndirməklə həm siyasi mövqelərini gücləndirir, həm də Cənubi Qafqazda sülh prosesinə müsbət təsir göstərir. Bu, regionda davamlı sabitliyin formalaşması baxımından son dərəcə vacibdir”.
Ceyhun Məmmədov yekunda bildirib ki, Prezident İlham Əliyevin yürütdüyü çoxşaxəli və balanslaşdırılmış xarici siyasət nəticəsində Azərbaycan həm regional, həm də qlobal müstəvidə mühüm siyasi və iqtisadi aktora çevrilib, ölkənin strateji mövqeyi isə durmadan möhkəmlənir.
Bölmənin digər xəbərləri
