Azərbaycanın milli bayramı münasibətilə Bratislavada rəsmi qəbul təşkil edilib
Bratislava, 30 may, AZƏRTAC
Slovakiyanın paytaxtı Bratislava şəhərində 28 May - Respublika Gününə həsr olunmuş rəsmi qəbul təşkil edilib.
Azərbaycanın bu ölkədəki fəxri konsulluğu tərəfindən Azərbaycan səfirliyinin dəstəyi ilə təşkil olunmuş tədbirdə Slovakiyanın dövlət və hökumət nümayəndələri, parlamentin deputatları, Bratislavada akkreditə olunmuş diplomatik korpusun təmsilçiləri, səfirliyin əməkdaşları və bu ölkədə yaşayan həmyerlilərimiz iştirak ediblər.
Azərbaycanın Avstriya, Slovakiya və Sloveniyadakı səfiri Qalib İsrafilov tədbir iştirakçılarına bu il 101-ci ildönümü qeyd olunan Azərbaycan Xalq Cümhuriyyəti barədə məlumat verib. Müstəqillik haqqında 1918-ci il bəyannaməsində demokratik dəyərlər, insan hüquqları, qadın və kişi bərabərliyi kimi dəyərlərin əks olunduğunu bildirən səfir, həmçinin bəyannamədə digər dövlətlərlə sülh şəraitində münasibət qurmaq istəyinin əks olunduğunu qeyd edib. Müsəlman Şərqində ilk demokratik respublikanın Azərbaycanda qurulduğunu diqqətə çatdıran səfir qısa mövcudluğu dövründə ölkədə ciddi siyasi və iqtisadi təməl üzərində müasir dövlətin təşkil olunduğunu, dünyəvi və demokratik dəyərlərə söykənən islahatlar və quruculuq işlərinin aparıldığını qeyd edib.
Bu il, eyni zamanda, Azərbaycan diplomatik xidmət orqanlarının yaradılmasının 100 illik yubileyi olduğunu qeyd edən səfir bu günün 1919-cu il iyulun 9-da Azərbaycan Xalq Cümhuriyyəti Xarici İşlər Nazirliyinin yaradılmasına dair qərarın qəbul edilməsi ilə əsaslandırıldığını bildirib. Qeyd edilib ki, Prezident İlham Əliyevin Fərmanı ilə həmin tarixi gün - 9 iyul Azərbaycan diplomatlarının peşə bayramı elan edilib və dünyanın müxtəlif ölkələrində bu yubiley geniş şəkildə qeyd edilir.
Tədbirin bədii hissəsində Vyana Konservatoriyasının məzunu, Azərbaycan Dövlət Akademik Filarmoniyasının dirijoru Mustafa Mehmandarovun rəhbərliyi ilə “Xəzər virtuozları” orkestri konsert proqramı ilə çıxış edib. Konsertdə Mərziyə Hüseynova (sopran), Aleksandra Tirsu (skripka) və Fərhad Aşumovun (skripka) ifaları böyük maraqla qarşılanıb. Konsertdə Üzeyir Hacıbəyli, Fikrət Əmirov, Qara Qarayev, İlya Zelyenka, Antonio Vivaldi və digər bəstəkarların əsərləri səsləndirilib.
Elgün Niftəli
AZƏRTAC-ın xüsusi müxbiri
Bratislava
Bölmənin digər xəbərləri
