AZƏRBAYCANIN NEFT MƏDƏNLƏRİNDƏ KÜLƏK ENERJİSİNDƏN İSTİFADƏ OLUNACAQDIR
Şirkətdən AZƏRTAC-ın müxbirinə bildirmişlər ki, küləklə işləyən elektrik stansiyalarının inşası artıq zərurətə çevrilmişdir, çünki təkcə ARDNŞ-in illik elektrik enerjisi sərfi 1,2 milyard kilovat-saat təşkil edir ki, bu da təqribən 38-40 milyon dollar vəsait deməkdir. Külək elektrik stansiyasının işə salınması xeyli vəsaitə qənaət etməyə imkan verəcəkdir. İlkin hesablamalara görə, 1 MVt gücə malik külək elektrik stansiyası ildə 5,5-6 milyon kilovat-saat enerji istehsal edə bilir və onun tikintisi cəmi 750 min dollara başa gəlir.
Yeni layihə ilk mərhələdə Ə.Əmirov adına Neft-Qazçıxarma İdarəsinin ərazisində həyata keçiriləcəkdir. Burada tikiləcək külək elektrik stansiyası əvvəlcə mədənləri, daha sonra dərin dəniz özülləri və Azərbaycan qaz emalı zavodlarını ucuz enerji ilə təchiz edəcəkdir. Azərbaycana Almaniyadan gətiriləcək stansiya qurğusunun nəqliyyat xərcləri nəzərə alınmaqla, onun dəyəri 1 milyon dollara çatacaqdır. Bu məbləğ BMT-nin İnkişaf Proqramı, Almaniyanın “Vimpro” şirkətinin və ARDNŞ-in öz vəsaiti hesabına ödəniləcəkdir. Layihə bir il ərzində reallaşmalıdır.
Bölmənin digər xəbərləri
