Azərbaycanın xarici siyasətinin mühüm istiqamətlərindən biri də çoxtərəfli diplomatiyadır RƏY
Bakı, 20 iyul, AZƏRTAC
Müasir beynəlxalq münasibətlər sistemi son onilliklərdə heç vaxt olmadığı qədər mürəkkəb və ziddiyyətli mərhələyə qədəm qoyub. Dünyanın müxtəlif bölgələrində davam edən münaqişələr, geosiyasi qarşıdurmalar, beynəlxalq hüququn selektiv tətbiqi, iqtisadi sanksiyalar və qlobal təhlükəsizlik problemləri dövlətlərin xarici siyasət strategiyalarına yenidən baxmasını zəruri edib. Belə mürəkkəb şəraitdə Azərbaycan milli maraqlarını əsas götürən, beynəlxalq hüquqa söykənən və qarşılıqlı hörmət prinsipinə əsaslanan xarici siyasət kursu ilə regionun ən etibarlı və nüfuzlu dövlətlərindən birinə çevrilib. Prezident İlham Əliyevin IV Şuşa Qlobal Media Forumunda səsləndirdiyi fikirlər də Azərbaycanın xarici siyasət fəlsəfəsinin əsas prinsiplərini bir daha nümayiş etdirdi.
Bunu AZƏRTAC-a açıqlamasında Milli Məclisin deputatı Şahin Seyidzadə deyib.
O bildirib ki, Azərbaycanın müstəqillik dövründə həyata keçirdiyi xarici siyasət kursunun əsas xüsusiyyətlərindən biri balanslaşdırılmış diplomatiyadır. Bu siyasət sayəsində ölkəmiz müxtəlif siyasi və iqtisadi mərkəzlərlə qarşılıqlı faydalı münasibətlər qurmağa nail olub. Azərbaycan həm Avropa İttifaqı, həm Türk Dövlətləri Təşkilatı, həm İslam Əməkdaşlıq Təşkilatı, həm də digər beynəlxalq qurumlarla fəal əməkdaşlıq edir. Bu yanaşma ölkənin milli maraqlarının qorunmasına və xarici siyasətdə müstəqil qərarvermə imkanlarının genişlənməsinə şərait yaradıb. Beynəlxalq hüquq Azərbaycanın xarici siyasət konsepsiyasının əsas sütunlarından biridir. Dövlətimizin başçısı çıxışında bir daha bəyan etdi ki, ölkəmiz bütün dövlətlərin suverenliyinə, ərazi bütövlüyünə və sərhədlərinin toxunulmazlığına hörmət edilməsinin tərəfdarıdır. Azərbaycan hesab edir ki, beynəlxalq münasibətlərdə ikili standartlara yol verilməməli, beynəlxalq hüquq normaları bütün dövlətlərə eyni şəkildə tətbiq olunmalıdır. Bu prinsip Azərbaycanın uzun illər ərzində üzləşdiyi işğal problemi fonunda xüsusi əhəmiyyət daşıyır.
Şuşa Qlobal Media Forumunun məhz Qarabağda keçirilməsinin də mühüm siyasi mesaj daşdığını qeyd edən deputat deyib: “Bu tədbir vasitəsilə beynəlxalq media nümayəndələri bölgədə aparılan bərpa və quruculuq işlərini yerində müşahidə edir, Azərbaycanın postmünaqişə inkişaf modelini yaxından öyrənirlər. Bu isə informasiya müharibəsində obyektiv həqiqətlərin dünya ictimaiyyətinə çatdırılması baxımından mühüm əhəmiyyət kəsb edir. Prezident İlham Əliyevin çıxışında diqqətçəkən əsas məsələlərdən biri də sülh gündəliyi idi. Sülh müqaviləsinin imzalanması, kommunikasiyaların açılması və iqtisadi əməkdaşlığın inkişaf etdirilməsi Cənubi Qafqazda yeni inkişaf mərhələsinin başlanğıcı ola bilər”.
Ş.Seyidzadə vurğulayıb ki, Azərbaycanın xarici siyasətinin mühüm istiqamətlərindən biri də çoxtərəfli diplomatiyadır. Azərbaycanın artan beynəlxalq nüfuzu humanitar diplomatiya sahəsində də özünü göstərir. Bakı Beynəlxalq Humanitar Forumu, Qlobal Bakı Forumu, Şuşa Qlobal Media Forumu kimi nüfuzlu tədbirlər müxtəlif ölkələrdən siyasətçiləri, ekspertləri, jurnalistləri və beynəlxalq təşkilatların nümayəndələrini bir araya gətirir. Bu platformalar qlobal problemlərin müzakirəsinə və yeni əməkdaşlıq imkanlarının yaranmasına mühüm töhfə verir. Eyni zamanda, Azərbaycan Türk dünyasında inteqrasiya proseslərinin fəal iştirakçısıdır.
“Azərbaycanın xarici siyasətinin uğurunu şərtləndirən əsas amillərdən biri də daxili sabitlikdir. Güclü iqtisadiyyat, siyasi sabitlik və cəmiyyətin həmrəyliyi ölkənin beynəlxalq arenadakı mövqeyini daha da gücləndirir. Məhz buna görə də Azərbaycan bu gün həm regional, həm də qlobal layihələrin etibarlı tərəfdaşı kimi qəbul olunur. Qarabağda aparılan genişmiqyaslı bərpa və yenidənqurma işləri də Azərbaycanın sülh siyasətinin praktik ifadəsidir. Məqsəd yalnız dağıdılmış şəhər və kəndləri bərpa etmək deyil, həm də bölgəni əməkdaşlıq, inkişaf və rifah məkanına çevirməkdir. Bu siyasət gələcəkdə Cənubi Qafqazda davamlı sülhün möhkəmlənməsinə mühüm töhfə verə bilər. Prezident İlham Əliyevin IV Şuşa Qlobal Media Forumunda səsləndirdiyi fikirlər Azərbaycanın xarici siyasət konsepsiyasının əsas mahiyyətini bir daha nümayiş etdirdi. Milli maraqlara söykənən müstəqil siyasət, beynəlxalq hüquqa hörmət, qarşılıqlı etimad, dialoq və əməkdaşlıq prinsipləri ölkəmizin beynəlxalq nüfuzunu davamlı şəkildə artırır. Müasir dünyanın mürəkkəb geosiyasi reallıqları fonunda Azərbaycan sabitlik, etibarlılıq və praqmatik əməkdaşlıq modeli təqdim edən dövlət kimi çıxış edir. Qarşıdakı illərdə də bu strateji kursun davam etdirilməsi ölkəmizin beynəlxalq mövqeyinin daha da möhkəmlənməsinə, regionda sülhün və əməkdaşlığın inkişafına mühüm töhfə verəcək”, - deyə Milli Məclisin deputatı bildirib.
Bölmənin digər xəbərləri
