Azərbaycanlı IT mütəxəssisi: Məqsədimiz Azərbaycanın IT ekosistemini qlobal şəbəkəyə daha sıx inteqrasiya etməkdir
Bakı, 7 noyabr, AZƏRTAC
Əsrimiz elm, texnologiya, innovasiyalar, süni intellekt əsridir. Rəqəmsallaşma və süni intellektin dövlət idarəçiliyi, sosial xidmətlər və əmək bazarına təsiri çox böyükdür. Bu baxımdan dövlət, özəl sektor və təhsil müəssisələrinin birgə şəkildə bootkamplar və hakatonlar təşkil etməsi, həmçinin beynəlxalq şirkətlərlə tərəfdaşlıq qurması çox önəmlidir. Doğru platforma yaradılarsa, azərbaycanlı gənclərin qlobal informasiya texnologiyaları (IT) layihələrində rəqabət aparmaq üçün potensialı kifayət qədər yüksəkdir. Vətəndən xaricdə yaşasaq da, ürəyimiz Azərbaycanla döyünür. Biz Azərbaycanın IT ekosistemini qlobal şəbəkəyə daha sıx inteqrasiya etməyi qarşıya məqsəd qoymuşuq.
Bu fikirləri AZƏRTAC-a məxsusi müsahibəsində Böyük Britaniyada fəaliyyət göstərən “Quberts Technologies” şirkətinin təsisçisi, IT sahəsində peşəkar mütəxəssis Fərid Baxışlı deyib.
Karyerasına texniki mühitdə başlayan, sonra layihə idarəçiliyi və komanda rəhbərliyi üzrə bacarıqlarını inkişaf etdirən F.Baxışlı menecment kimi ABŞ mərkəzli qlobal IT autsorsinq şirkəti “Jaxel Inc”in Azərbaycandakı regional ofisinin baş icraçı direktoru kimi fəaliyyət göstərib. Artıq onun informasiya texnologiyaları sahəsində 10 ildən çox təcrübəsi var.
“Son illərdə qazandığım təcrübəni və formalaşdırdığımız peşəkar ekosistemi daha sistemli şəkildə davam etdirmək üçün həmkarlarım Yusif Cəbrayılov və Əli Əbdiyev ilə birlikdə Londonda “Quberts Technologies” şirkətini təsis etmişik. Biz texnologiya şirkəti olaraq bizneslərə proqram təminatının inkişafı, bulud transformasiyası, data analitika, dizayn və IT təhlükəsizliyi üzrə həllər təqdim edir, “sürətli, məsuliyyətli və məhsulyönümlü” yanaşma ortaya qoyuruq. Bu platforma vasitəsilə həm beynəlxalq bazarda səmərəli rəqəmsal həllər təqdim edir, həm də azərbaycanlı mütəxəssislərin qlobal layihələrə inteqrasiyasına, onların bilik və potensialının daha geniş miqyasda tanıdılmasına şərait yaradırıq”, - deyə o bildirib.
Müsahibimizin sözlərinə görə, “Quberts Technologies” şirkətinin beynəlxalq bazarda mövcudluğu Azərbaycan IT mütəxəssislərinin peşəkarlığını və potensialını xaricdə nümayiş etdirməyə imkan verir. Bu, həm ölkəmizin texnoloji imicinə müsbət təsir edir, həm də “Azərbaycanlı mütəxəssis” brendinin formalaşmasına xidmət göstərir. Prioritetlərimizdən biri də peşəkar azərbaycanlı mütəxəssislərlə işləmək və gələcəkdə onların oxşar layihələr vasitəsilə beynəlxalq layihələrə çıxışını təmin etməkdir. Bu, həm yeni iş imkanları yaradır, həm də Azərbaycanda formalaşan IT üzrə kadrların “beyin şəbəkəsi” prinsipi ilə Vətənə bağlı qalmasına şərait yaradır. Məqsəd Azərbaycanda həm texniki biliklərin, həm də düzgün layihə idarəçiliyi, məhsul mədəniyyəti və qlobal düşüncə tərzinin güclənməsinə töhfə verməkdir. Hazırda beynəlxalq IT layihələri və şirkətin daxili məhsulu olan “Safe Circle” layihəsi üzərində işləyirik.
Rəqəmsallaşma və süni intellektin gündəlik həyatımıza üç əsas istiqamətdə dəyişiklik gətirdiyini vurğulayan IT mütəxəssisi deyib: “Dəyişikliklər əsasən dövlət idarəçiliyi, sosial xidmətlər və əmək bazarına təsirdə özünü göstərir, bu sahələrdə təsirini artırır. Müasir dövrdə bu sahənin mütəxəssisləri üçün texniki bilik və yaradıcı düşüncənin bir arada olması çox mühümdür. Texniki bilik bazadır, yəni, memarlığı anlamayan tərtibatçı, təhlükəsizliyi bilməyən mühəndis və ya sistemi dərk etməyən analitik uzunmüddətli dəyər yarada bilmir. Ancaq artıq yalnız kod yazmağı bilmək kifayət deyil. Bugünkü layihələrdə fərqləndirən cəhət problemi biznes baxımından başa düşmək, qeyri-standart həll tapmaq, müştərinin ehtiyacını əvvəlcədən görmək və komanda ilə aydın ünsiyyət qurmaqdır. Bu, artıq yaradıcı düşüncə, sistemli yanaşma və sahibkar təfəkkürüdür”.
Həmyerlimizin fikrincə, IT sahəsində ən uğurlu mütəxəssis həm dərin texniki savada malik olub, həm də “Bu həll real həyatda necə işə yarayacaq?” sualını verə biləndir. “Məncə, süni intellekt insan yaradıcılığını əvəz edən yox, gücləndirən alətdir. Amma şərt odur ki, ondan düzgün istifadə edilsin. Gələcəyin güclü mütəxəssisi süni intellekti rəqib kimi yox, “yaradıcı həmkar” kimi istifadə edən insandır”, - deyə o əlavə edib.
Azərbaycanlı gənclərin beynəlxalq IT layihələrində iştirakına münasibət bildirən Fərid Baxışlı diqqətə çatdırıb ki, bu məqsədlə gənclərin öz baza standartlarını inkişaf etdirmələri, komandada işləmək bacarıqları, real təcrübə, qlobal iş qaydalarını bilmələri çox önəmlidir.
“Gələcək planlarımdan biri də Azərbaycan–Britaniya elmi-texnoloji əməkdaşlığının gücləndirilməsidir. Bu məqsədlə Azərbaycanla Böyük Britaniya şirkətləri, ali təhsil ocaqları arasında birgə layihələr və təcrübə proqramlarını təşviq etməyə çalışırıq. Bundan başqa, süni intellekt, kibertəhlükəsizlik sahələrində birgə tədqiqat və pilot layihələr üçün platformalar yaratmağı qarşıya məqsəd qoymuşuq. Qısacası, gələcək planım fərdi karyeramı Azərbaycanın IT ekosistemi üçün körpüyə çevirmək, Londonda qazandığımız bilik, şəbəkə və etimadı gənclərin, yerli institutların xeyrinə işlətməkdir”, - deyə Fərid Baxışlı əlavə edib.
Bölmənin digər xəbərləri
