AZƏRBAYCANLI MƏKTƏBLİLƏR VAŞİNQTONDA “MÜLKİ TƏHSİL” HƏFTƏLİYİNDƏ İŞTİRAK ETMİŞLƏR
Dövlət katibinin təhsil və mədəniyyət məsələləri üzrə müavini Patrisia Hərrison AZƏRTAC-ın müxbiri ilə söhbətində “Gələcək liderlər mübadiləsi” proqramından danışaraq bildirmişdir: “Keçmiş sovet respublikaları ilə apardığımız proqramın uğuru bizi o qədər ruhlandırdı ki, Dövlət Departamenti, əsasən, müsəlman ölkələrini əhatə edən “Gənclərin mübadiləsi və təhsil” proqramını təsis etmək qərarına gəldi. Məktəb şagirdləri ilə həyata keçirilən proqramın xüsusiyyəti ondadır ki, bu yaşda uşaqlar daha açıq, daha səmimi və təhsilə daha meylli olurlar. Onlar düşündüklərini deməkdən çəkinmir və stereotipləri qəbul etmirlər. Bu proqramın Amerika tərəfi üçün də faydası çoxdur. Uşaqlar yerli ailələrdə qalaraq və amerika məktəbliləri ilə gündəlik təmasda olaraq, onları öz ölkələri ilə tanış edirlər”.
Proqramın 10 illik yubileyini Dövlət Departamenti Vaşinqtonda “Mülki təhsil” həftəliyi keçirməklə qeyd etmişdir. Həftəlikdə iştirak etmək üçün Amerika paytaxtına keçmiş sovet respublikalarını təmsil edən 126 yuxarı sinif şagirdi dəvət olunmuşdu. Onlar “Mülki təhsil” həftəliyində iştirak hüququnu 1400 nəfər arasından demokratiya mövzusunda yazdıqları inşanın qalibləri kimi qazanmışdılar.
126 iştirakçıdan 8-i Azərbaycanı təmsil edirdi. Səkinə Əliyeva, Gülnar Hacıyeva, Cavid Məmmədov, Muxtar Qaradaği, Nərminə Abdullayeva, Fazil Məmmədov, Mədinə Hacıyeva və Leyla Məmmədli olduqca gərgin proqram çərçivəsində Vaşinqtonda ABŞ hökumət strukturlarının işi, demokratiya və vətəndaşlıq məsuliyyətinin əsasları ilə tanış olmuş, Konqres və Dövlət Departamentinin yüksək vəzifəli rəsmiləri ilə görüşmüşlər. Məktəblilər hazırda təhsil aldıqları ştatları təmsil edən senator və konqresmenlərlə də söhbət etmiş, onlara Azərbaycan haqqında məlumat vermişlər.
Proqram iştirakçılarından Gülnar Hacıyeva demişdir: “Hazırda təhsil aldığım İndiana ştatının senatoru Riçard Luqar bizimlə görüşdə bildirmişdir ki, Azərbaycan ABŞ-ın ən yaxın dostu və müttəfiqlərindən biridir. Ölkəmizdə aparılan islahatlardan razılıqla danışan senator Azərbaycanın siyasətinə verdiyi müsbət qiyməti mən evə döndükdən sonra Bakıda çatdırmağımı xahiş etmişdir”.
Leyla Məmmədli isə ABŞ və Azərbaycanın məktəb təhsilini müqayisə etmişdir: “Amerikalı sinif yoldaşlarımla bir qədər oxuduqdan sonra anladım ki, Azərbaycanda təhsil səviyyəsi çox yüksəkdir. Mən buradakı dərslərin öhdəsindən asanca gəlirəm. Fəxr edirəm ki, ölkəmizdə bizə mükəmməl təhsil verirlər və savadlı uşaqlarımızın sayı çoxdur”.
Dövlət Departamenti tərəfindən azərbaycanlı şagirdlərə “Mülki təhsil” həftəliyini uğurla başa çatdırdıqları barədə sertifikatlar təqdim edilmişdir.
Bölmənin digər xəbərləri
