“AZƏRENERJİ” SC-NİN PREZİDENTİ ÖTƏN İLƏ YEKUN VURMUŞDUR
“Azərenerji” Səhmdar Cəmiyyətinin prezidenti Etibar Pirverdiyev martın 12-də keçirilən mətbuat konfransında bildirmişdir ki, 2003-cü ildə ölkəmizin elektrik enerjisi müəssisələri təxminən 22 milyard kilovat-saat elektrik enerjisi istehsal etmişdir ki, bunun da cəmi 2,5 milyard kilovat-saatı su elektrik stansiyalarının payına düşür. Bununla yanaşı, elektrik enerjisinin istehlakı da artmışdır. Ötən il bu göstərici təxminən 23 milyard kilovat-saat olmuşdur. Hazırda fəaliyyət göstərən 9 elektrik stansiyasından 5-i su elektrik stansiyasıdır.
E.Pirverdiyev jurnalistlərin suallarına cavabında xüsusi vurğulamışdır ki, hazırda stansiyaların istehsal gücü respublikamızın elektrik enerjisinə olan real tələbatını ödəməyə imkan verir. O, elektrik enerjisi sahəsində beynəlxalq əməkdaşlıq məsələlərinə də toxunaraq, qonşu ölkələrlə qarşılıqlı surətdə faydalı münasibətlərin inkişaf etdiyini söylədi.
Bölmənin digər xəbərləri
