“AZƏRREYL” DALBADAL DÖRDÜNCÜ QƏLƏBƏSİNİ QAZANMIŞDIR
AZƏRTAC-ın müxbiri xəbər verir ki, dekabrın 1-də Belqradda Çempionlar liqasının “B” qrupunda yarışan qadın voleybolçuların görüşündə Serbiya-Çernoqoriyanın “Srvena Zvezda” və Azərbaycanın “Azərreyl” komandaları qarşılaşmışlar.
Oyun Azərbaycan voleybolçularının tam üstünlüyü ilə keçmişdir. Birinci hissədə uzun müddət hesab arasında fərq çoxalmasa da, ustalıq səviyyəsinə görə voleybolçularımızın üstünlüyü aydın nəzərə çarpırdı. Təsadüfi deyildir ki, birinci hissə “Azərreyl”in 6 xal üstünlyü şəraitində - 25:19 hesabı ilə başa çatdı.
İkinci hissədə ilk xalı “Srvena Zvezda”nın qazanmasına, üstünlüyü xeyli əldə saxlamasına baxmayaraq, son sözü Faiq Qarayevin yetirmələri dedilər - 26:24.
Üçüncü hissədə komandamız daha inamlı təsir bağışlayırdı. Artıq 8-ci dəqiqədə onlar dörd xal üstünlüyü ilə irəli çıxmışdılar. Hesab qonaqların xeyrinə getdikcə artırdı. Ev sahiblərinin məşqçiləri məğlubiyyətlə barışaraq komandanın heyətində məqsədsiz dəyişikliklər edir, qızlara sadəcə olaraq oynamaq imkanı verirdi. Bu hissə də həmyerlilərimizin qələbəsi ilə başa çatdı- 25:13.
Beləliklə, “Azərreyl” dalbadal dördüncü qələbəsini qazandı.
Bölmənin digər xəbərləri
