“Azərtütün” tərəfindən indiyədək şimal-qərb rayonlarında 90,5 hektar sahədə tütün əkilib
Zaqatala, 17 aprel, Mustafa Dadaşov, AZƏRTAC
Builki mövsümdə “Azərtütün” ASC tərəfindən respublikamızın şimal-qərb bölgəsinə daxil olan Balakən, Zaqatala, Qax, Şəki və Oğuz rayonlarında 849,2 hektar sahədə “Virciniya botaniki” növlü tütün əkilməsi nəzərdə tutulur. Təsərrüfatlarda artıq tütün əkininə start verilib. Mövsümün ilk günlərində rayonlarda 90,5 hektar sahədə tütün əkilib.
Səhmdar cəmiyyətdən AZƏRTAC-ın bölgə müxbirinə bildirilib ki, bölgə üzrə ilk olaraq Balakən rayonunda istixana şəraitində yetişdirilmiş tütün şitillərinin sahələrə köçürülməsinə başlanılıb. Balakənli fermerlər mövsümün ilk günlərində 37,5 hektar sahəyə tütün şitilləri köçürüblər. Bundan əlavə, şirkətin özü tərəfindən də indiyədək Zaqatala və Şəki rayonlarının ərazilərində 53 hektar sahədə tütün əkilib və bu iş davam etdirilir.
Tütün istehsalı ilə əlaqədar cari ildə ASC tərəfindən şimal-qərb rayonlarında 50 fermerlə müqavilə bağlanılıb. Fermerlərlə bağlanılan müqavilələr üzrə tütün əkiləcək sahə 422,6 hektar təşkil edir. Eyni zamanda, şirkətin özü tərəfindən bu il şimal-qərb bölgəsində 426,6 hektar sahədə tütün əkilməsi nəzərdə tutulur.
Bölmənin digər xəbərləri
