AzMİU Qızıl Orda Korkut Ata Dövlət Universiteti ilə əməkdaşlığı genişləndirir
Bakı, 4 mart, AZƏRTAC
Qazaxıstanın Qızıl Orda Korkut Ata Dövlət Universitetinin rektoru Beybitkul Karimovanın rəhbərlik etdiyi nümayəndə heyəti Azərbaycan Memarlıq və İnşaat Universitetində (AzMİU) olub.
AzMİU-dan AZƏRTAC-a bildirilib ki, qazaxıstanlı qonaqların rektor Gülçöhrə Məmmədova ilə görüşündə Azərbaycanla Qazaxıstan arasında dostluq və strateji tərəfdaşlıq münasibətlərinin təhsil sahəsində də uğurla inkişaf etdiyi vurğulanıb. Rektor G.Məmmədova Qızıl Orda Korkut Ata Dövlət Universiteti ilə AzMİU arasında uğurla davam edən akademik və elmi əməkdaşlıqdan danışıb. Bu əməkdaşlığın gələcəkdə daha da genişləndirilməsinin vacibliyinə toxunub.
Qızıl Orda Korkut Ata Dövlət Universitetinin rektoru Beybitkul Karimova təhsil sahəsində innovativ yanaşmaların tətbiqinin və elmi-tədqiqat istiqamətində əməkdaşlığın əhəmiyyətini vurğulayıb. O, gələcəkdə iki universitet arasında əməkdaşlığın yeni perspektivlər açacağına inandığını deyib.
Dəyirmi masa ətrafında keçən görüş zamanı AzMİU ilə Qızıl Orda Korkut Ata Dövlət Universiteti arasında 2023-cü ildə imzalanmış memoranduma diqqət çəkilib və bu sənəd çərçivəsində əməkdaşlıq platformasının formalaşdığı qeyd olunub.
Bundan əlavə, akademik mübadilə proqramlarının genişləndirilməsi, ortaq elmi-tədqiqat layihələrinin həyata keçirilməsi və beynəlxalq reytinqlərdə mövqelərin gücləndirilməsi istiqamətində müzakirələr aparılıb. Eyni zamanda, ali təhsil sahəsində əməkdaşlığın inkişaf etdirilməsi və müvafiq sahələrdə yeni addımlar atılması barədə razılıq əldə edilib.
Bölmənin digər xəbərləri
