“Azneft” İstehsalat Birliyinin “Neft Daşları” NQÇİ-nin dəniz yataqlarında ekoloji monitorinq aparılmışdır
Bakı, 11 iyun (AZƏRTAC). Azərbaycan Respublikası Dövlət Neft Şirkətinin Ekologiya İdarəsinin ekoloji monitorinq departamentinin əməkdaşları tərəfindən “Azneft” İstehsalat Birliyinin “Neft Daşları” neft-qaz çıxarma idarəsinin (NQÇİ) “Palçıq Pilpiləsi” neft-qaz yatağında ətraf mühitin vəziyyətinin qiymətləndirilməsi məqsədilə “MPK-452” gəmisi ilə ekoloji monitorinq işləri həyata keçirilmişdir.
AZƏRTAC xəbər verir ki, yataqda aparılan monitorinq zamanı layihə üzrə seçilmiş hər bir stansiyada Niskin tipli batometr vasitəsilə dəniz suyunun üst, orta və alt qatlarından su nümunələri götürülmüşdür. Gəminin laboratoriyasındakı “MultiLine P4” çoxrejimli analitik cihaz vasitəsilə götürülmüş su nümunələrində hidrogen ionlarının qatılığı, oksigenin miqdarı, suyun duzluluğu, elektrik keçiriciliyi və temperaturu təyin olunmuşdur.
Bundan əlavə, dəniz dibindən dib çöküntüləri, bentos nümunələri, dəniz suyundan fitoplankton və zooplankton nümunələri götürülmüş, tədqiqat gəmisinin laboratoriyasında qablaşdırılmış və tədqiq olunmaq üçün kompleks tədqiqatlar laboratoriyasına təhvil verilmişdir.
Monitorinq zamanı stansiyalarda “Falmouth Scientific, Inc.” (ABŞ) şirkətinin istehsal etdiyi müasir tipli “3D-ACM-7000” cihazından istifadə olunmaqla dəniz axınlarının sürəti və istiqaməti ölçülmüşdür.
Belə monitorinq işləri digər dəniz yataqlarında da davam etdiriləcəkdir.
Bölmənin digər xəbərləri
