“BAHAR”- HÖVSAN-SURAXANI QAZ KƏMƏRİNİN SUALTI HİSSƏSİNİN ÇƏKİLİŞİNƏ BAŞLANMIŞDIR
Azərbaycan Respublikası Dövlət Neft Şirkətindən AZƏRTAC-a bildirmişlər ki, “Süleyman Vəzirov” borudüzən gəmisinin iştirakı ilə “Bahar”-Hövsan-Suraxanı qaz kəmərinin sualtı hissəsinin çəkilişinə başlanılmışdır.
İnşaatçılar ümumi uzunluğu 132 metr olan 11 borunu qaynaq edərək dənizin dibinə salmışlar. Yaxın günlərdə çəkiliş sahəsində gündəlik iş həcmi 1-1,5 kilometrə çatdırılacaqdır.
İyirmi düymlük “Bahar”-Hövsan-Suraxanı qaz kəməri 2008-ci ilin əsas buraxılış obyektlərindən biridir. Kəmər iki hissədən - sualtı və quru hissələrdən ibarət olacaqdır. Onun 32 kilometrlik “Bahar”-Hövsan hissəsi dənizin dibi ilə, 12 kilometrlik Hövsan-Suraxanı hissəsi isə quruda çəkiləcəkdir. Kəmər “Şimal” elektrik stansiyasını, eləcə də Bakı ətrafında yerləşən digər istehlakçıları qazla təmin edəcəkdir. Kəmərin ötürmə qabiliyyəti sutkada 5 milyon kubmetrdir. Kəmərlə “Günəşli” yatağında hasil edilən qaz nəql ediləcəkdir.
Yeni qaz kəməri bu ilin sonunadək istismara veriləcəkdir.
Bölmənin digər xəbərləri
