Bakalavrlar Azərbaycan Universitetinin Məsləhət Mərkəzinə müraciət edə bilərlər
Bakı, 13 yanvar, AZƏRTAC
Azərbaycan Universitetinin Abituriyent Məsləhət Mərkəzi hər il olduğu kimi, bu il də fəaliyyətini davam etdirir. Ali təhsil müəssisələrinin magistratura səviyyəsinə qəbul olmaq istəyən bakalavrlar məsləhət xidməti və texniki dəstək üçün mərkəzə müraciət edə bilərlər.
Universitetdən AZƏRTAC-a bildirilib ki, Abituriyent Məsləhət Mərkəzi həftənin 5 günü (şənbə, bazar və bayram günləri istisna olmaqla) saat 10:00-dan 17:00-dək ödənişsiz əsaslarla fəaliyyət göstərir.
Mərkəz Dövlət İmtahan Mərkəzi ilə razılıq əsasında 2018-ci ildə yaradılıb. Mərkəzin xüsusi təlim keçmiş əməkdaşları abituriyentlərə, subbakalavrlara və bakalavrlara tələbə qəbulu qaydaları, ali və orta ixtisas təhsili müəssisələrinə ərizə qəbulu, “Abituriyentin elektron ərizəsi”nin doldurulma və təsdiq edilmə qaydası və bu zaman qarşıya çıxa biləcək texniki problemlərin həlli, “Bakalavrın elektron ərizəsi”nin doldurulma və təsdiq edilmə qaydası və bu kimi məsələlər haqqında texniki dəstək və məsləhət xidməti göstərirlər.
Qeyd edək ki, 2025-2026-cı tədris ili üçün Azərbaycan Respublikasının ali təhsil müəssisələrinin magistratura pilləsində təhsil almaq istəyən bakalavrların ərizə qəbulu başlayıb. Ərizə qəbulu 2025-ci il yanvarın 13-dən 27-dək davam edəcək. Qəbul imtahanının I cəhdinin isə 2025-ci il fevralın 16-da keçirilməsi nəzərdə tutulur.
Bölmənin digər xəbərləri
