Bakı-Ankara-İslamabad birliyi ölkələrimizin gücünü daha da artırır ŞƏRH
Bakı, 29 may, AZƏRTAC
Azərbaycan və Türkiyə liderlərinin Laçın beynəlxalq hava limanının açılışında birgə iştirakının, eyni zamanda, Laçında Pakistan Baş nazirinin də iştirakı ilə liderlərin üçtərəfli Zirvə görüşünün keçirilməsinin rəmzi və tarixi əhəmiyyəti var. Azərbaycanın Müstəqillik Günündə qardaş Türkiyə lideri və 30 il təmənna olmadan Ermənistanı işğalçı kimi tanıyan Pakistanın Baş nazirinin Şərqi Zəngəzura səfəri təsadüfi deyil. Bu, qardaşlıq münasibətlərinin daha da möhkəmləndiyini təsdiqləyir. Ümumiyyətlə, son illərin təcrübəsi də göstərir ki, Bakı-Ankara-İslamabad birliyi ölkələrimizin nüfuzunu və gücünü daha da artırır.
Bu sözləri AZƏRTAC-a açıqlamasında Milli Məclisin deputatı Nigar Məmmədova deyib.
Budəfəki yüksəksəviyyəli görüşlər üçün Laçının seçilməsi ilə bağlı fikirlərini bölüşən deputat deyib: “Öncə onu qeyd etməliyik ki, Laçın Azərbaycanın keçid qapılarındandır və normal şərtlərdə, qonşu ölkəyə açılan ticarət qapısı ola bilərdi. Amma təəssüf ki, 1992-ci ilin mayında Laçın işğala məruz qaldı. Qırx dörd günlük Vətən müharibəsindən sonra isə azğın düşmən buradan silah-sursatın daşınması üçün dəhliz kimi istifadə etdi və Azərbaycana qarşı “humanitar böhtan” kampaniyasına başlandı. Məsələ burasındadır ki, Xankəndiyə təşkil edilən qanunsuz səfərlər də Laçın vasitəsilə edilirdi. Ermənilər cidd-cəhdlə “dəhliz” adı ilə Laçının tam azad olunmasına mane olmağa çalışırdı. Amma Azərbaycan Prezidentinin qətiyyəti, iradəsi və prinsipiallığı Laçının azad olunmasını təmin etdi”.
N.Məmmədova bildirib ki, 2023-cü ilin aprelində Laçın rayonunda, Ermənistanla sərhəddə sərhəd-buraxılış məntəqəsinin qurulması Azərbaycanın ərazi bütövlüyünün tam bərpası və bütövlükdə Cənubi Qafqaz regionunda təhlükəsizliyin təmin edilməsinə yönəlik çox uğurlu addım idi. Beləliklə, Azərbaycan öz sərhədlərinə nəzarət etməyə başladı. Eyni zamanda, 2023-cü il mayın 28-də - Müstəqillik Günündə Prezident İlham Əliyev birinci qrup Laçın sakinlərinə evlərin açarlarını təqdim etdi. Dövlətimizin başçısı həmin görüşdə bəyan etmişdi: “Bu görüşü məhz 28 May tarixində təşkil etməyimizin böyük rəmzi mənası var. Bu gün müstəqil Azərbaycan dövləti həm dünya miqyasında öz mövqelərini kifayət qədər möhkəmləndirib, eyni zamanda, bu gün müstəqil Azərbaycan dövləti istənilən nəticəni əldə etməyə qadirdir”.
Milli Məclisin deputatı diqqətə çatdırıb ki, qalib ölkə kimi Azərbaycan builki Müstəqillik Gününün sevincini qardaş ölkələr - zamanın sınağından çıxmış Türkiyə və Pakistan liderləri ilə bölüşdü. Laçında Azərbaycan-Türkiyə-Pakistan liderlərinin Zirvə görüşündə çox vacib mesajlar verildi. Ölkələr Müstəqillik Günümüzdə üçtərəfli formatda birliyini bir daha təsdiqlədi. Ən əsas məsələ, dövlətimizin başçısının da söylədiyi kimi azad edilmiş Laçından üç ölkənin dünyaya verdiyi mesajlar lazımi ünvana çatacaq. Laçında Müstəqillik Gününə həsr edilmiş konsertdən əvvəl çıxışı zamanı Azərbaycan Prezidenti qeyd etdi: “Türkiyə Prezidentinin və Pakistanın Baş nazirinin bizimlə bərabər bu bayram tədbirlərində iştirakı, bizə göstərilən dəstək və həmrəylik artıq tamamilə yeni dünya miqyasında reallıqlar yaradır. Bizim gücümüz birliyimizdədir”.
Bölmənin digər xəbərləri
