Bakı Dövlət Universiteti təhsil tariximizə yeni səhifələr yazır
Bakı, 15 sentyabr, AZƏRTAC
Azərbaycan Xalq Cümhuriyyətinin yadigarı olan, ilk ali məktəbimiz Bakı Dövlət Universitetində (BDU) bu gün elm və təhsilimizin inkişafı, tədris şəraitinin müasirləşdirilməsi istiqamətində mühüm tədbirlər həyata keçirilir.
AZƏRTAC xəbər verir ki, BDU-da ali təhsilin bütün səviyyələrində 25 minə yaxın tələbə təhsil alır. Üç mindən çox əməkdaş, o cümlədən 1500 nəfərə qədər professor-müəllim heyəti və elmi işçi çalışır. Onlardan 250-dən çoxu elmlər doktoru, professor, 1000 nəfərə yaxın əməkdaş isə fəlsəfə doktoru, dosentdir. Bu gün BDU-da 86 ixtisas, 264 ixtisaslaşma üzrə kadr hazırlığı həyata keçirilir. 16 fakültə, 120 kafedra, 2 elmi-tədqiqat institutu, Tədqiqat, İnkişaf və İnnovasiyalar üzrə Mükəmməllik Mərkəzi, 4 elmi-tədqiqat mərkəzi və 21 elmi-tədqiqat laboratoriyası, Elmi Kitabxana, 5 muzey, 5 beynəlxalq institut və mərkəz, 1 filial, 1 kollec və 1 liseylə fəaliyyət göstərən BDU-da ötən tədris ilində də böyük nailiyyətlər əldə olunub. Təhsildə Keyfiyyət Təminatı Agentliyi tərəfindən universitetin növbəti akkreditasiyası həyata keçirilib. BDU-nun 5 il müddətində akkreditasiya olunması ilə bağlı şəhadətnamə universitetə təqdim edilib.
“Heydər Əliyev İli” münasibətilə universitetin Heydər Əliyev Muzeyi və Heydər Əliyev Lektoriyası əsaslı təmir olunaraq yenidən qurulub, elektron lövhələr, məlumat daşıyıcıları ilə təchiz olunub. Əməkdaş və tələbələr arasında Ulu Öndərin zəngin irsi, azərbaycançılıq ideyasının təbliği, mühazirələrin və dəyirmi masaların təşkili məqsədilə informasiya-kommunikasiya avadanlıqları quraşdırılıb, muzey daha da zənginləşdirilib.
BDU-nun 2021-2030-cu illər üçün Strateji İnkişaf Planında qarşıya qoyulmuş vəzifələr, prioritet istiqamətlər əsasında universitetdə təhsilin inkişafı, elmi tədqiqatların keyfiyyətinin artırılması, idarəetmə sisteminin dinamikliyinin təmin edilməsi məqsədilə müntəzəm olaraq struktur islahatları aparılır, gənc kadrlar məsul vəzifələrə irəli çəkilir.
Tədris prosesində informasiya sistemi və texnologiyalarının və universitetin fəaliyyətində elektron idarəetmə sisteminin tətbiqi genişləndirilib. Artıq bir neçə ildir tətbiq olunan “Blackboard” - tədrisin elektron idarə edilməsi sistemindən istifadə e-təhsilin təkmilləşdirilməsinə və təhsil xidmətlərinin keyfiyyətinin artırılmasına şərait yaradıb. “Blackboard EdTech” ekosisteminə daxil olan “bulud platforması” vasitəsilə tələbələrin və müəllimlərin elektron məlumat bazası yaradılıb, tədris prosesinin və təhsilin məzmununun elektron idarəedilməsi, elektron qiymətləndirmə və digər tədris proseslərinin elektronlaşdırılmış həllinə nail olunub. Eləcə də İnsan Resurslarını Vahid İdarəetmə Sistemi, Elektron Sənəd Dövriyyəsi informasiya idarəetmə sistemi uğurla tətbiq olunub, BDU Elmi Kitabxanasının fondunun rəqəmsallaşdırılması sürətləndirilib.
Tədris resurslarının təkmilləşdirilməsi və genişləndirilməsi istiqamətində tədbirlər görülüb, müasir təlim prosesini aparmaq üçün auditoriyalar zəruri avadanlıqlarla (proyektorlar, kompüterlər, ağıllı lövhələr və s.) təchiz olunub, elmi-tədqiqat və tədris laboratoriyalarının maddi-texniki bazası möhkəmləndirilib.
Cari ildə BDU-nun komandaları İstanbulda keçirilən “TEKNOFEST-2023” Aerokosmik və Texnologiya Festivalında uğurlu nəticə göstərib, universitetin 4 komandası 6 layihə ilə "TEKNOFEST-2023"ün finalına vəsiqə qazanıb. Onlardan “BSU Creativity Workz” komandası “Driver’s Eye (avtomobil qəzalarını əvvəlcədən müəyyənləşdirərək sürücünü xəbərdar edən elektron sistem)” layihəsi ilə festivalda “Ağıllı nəqliyyat” kateqoriyası üzrə 109 finalçı arasında I yerə, “Humantek” komandası isə “Ağıllı damla sulama sistemi (torpağın mineral tərkibi, rütubət səviyyəsi, havanın temperaturu və təzyiqi kimi məlumatların toplanaraq mərkəzi stansiyaya naqilsiz ötürülməsi üçün əkin sahələrinin müxtəlif yerlərində günəş enerjisi ilə qidalanan kiçik stansiyalar)” layihəsi ilə “Aqrar texnologiyalar” kateqoriyasında 73 finalçı arasında III yerə layiq görülüb. "TEKNOFEST-2023"də yalnız BDU deyil, ümumilikdə ölkəmiz adına qazanılan bu möhtəşəm qələbə gənclərimizi yeni uğurlara və nailiyyətlərə sövq edir, onlarda elmi-tədqiqat fəaliyyəti üçün böyük stimul yaradır.
BDU ölkəmizdə “2019-2023-cü illər üçün Azərbaycan Respublikasında ali təhsil sisteminin beynəlxalq rəqabətliliyinin artırılması üzrə Dövlət Proqramı”na uyğun olaraq ikili diplom proqramlarını tətbiq edir. Bu baxımdan BDU-nun ABŞ, Almaniya, İsrail, İsveçrə, Qazaxıstan və digər ölkələrin qabaqcıl universitet və institutları ilə (Yerusəlim İbrani Universiteti (HUJI), Holon Texnologiya İnstitutu (HIT), Lumière Lyon 2 Universiteti, Biznes və Beynəlxalq Tədqiqatlar Universiteti (UBIS), Linkoln Universiteti, Satbayev adına Qazax Milli Tədqiqat Texniki Universiteti və s.) bakalavriat, magistratura, doktorantura pilləsi üzrə ikili diplom proqramlarını qeyd etmək olar. BDU beynəlxalq reytinqlərdə mövqeyini möhkəmləndirir. Ənənəvi olaraq QS, Scimago, WRWU, URAP kimi dünya universitetlərinin beynəlxalq reytinqində təmsil olunan universitet ölkəmizdən yeganə ali məktəb olaraq nüfuzlu “Times Higher Education” beynəlxalq reytinqində təmsil edilir.
2023-2024-cü tədris ilində BDU-da bakalavriat və magistratura səviyyəsinə qəbul planı artırılıb. Bakalavriat səviyyəsi üzrə 3 yeni ixtisas - “Statistika”, “Meliorasiya mühəndisliyi”, “Muzey, arxiv işi və abidələrin qorunması” ixtisaslarına qəbul aparılır. Həmçinin magistratura səviyyəsində “Tərcümə (ərəb dili üzrə)”, “Davamlı inkişafda təbii ehtiyatların idarə edilməsi” və “Gömrük ekspertizası” ixtisaslaşmaları üzrə də bu tədris ilindən etibarən qəbul aparılıb.
BDU-nun onlarca məzunu son illər yüksək nəticələr əldə edərək nüfuzlu xarici universitetlərə daxil olublar. Cari ildə BDU-nun 4 məzunu üçüncü “Yüksəliş” müsabiqəsinin qalibi olub. 2023-cü il üzrə Gənclər üçün Prezident mükafatçılarından 2-si, “Gənclərin xarici ölkələrin nüfuzlu ali təhsil müəssisələrində təhsil almalarına dair 2022-2026-cı illər üçün Dövlət Proqramı” çərçivəsində 2023-cü ildə xaricdə təhsil almaq fürsəti qazanmış tələbələrdən 16-sı BDU-nun məzunudur.
BDU-nun əməkdaşları, doktorant və tələbələri tərəfindən “Web of Science” bazasına daxil olan dərgilərdə 4123 elmi əsər dərc etdirilib.
Bölmənin digər xəbərləri
