“Bakı” futbol komandası “Simurq”a qalib gəlmişdir
Bakı, 1 noyabr (AZƏRTAC). Noyabrın 1-də futbol üzrə Topaz Premyer Liqasının 12-ci turunun açılış oyununda “Bakı” doğma meydanda Zaqatalanın “Simurq” komandasını qəbul etmişdir.
AZƏRTAC xəbər verir ki, rəqibini 3:2 hesabı ilə məğlub edən paytaxt təmsilçisi üç oyunluq qələbəsizlik seriyasına son qoymuşdur. “Bakı”nın heyətində Əfran İsmayılov dubl etmiş, Rauf Əliyev bir dəfə fərqlənmişdir. Rəqib komandadan isə qolları Patrik Osiako və Nicat Qurbanov vurmuşlar.
“Simurq” klubunun baş məşqçisi Giorgi Çixradze bildirmişdir ki, çoxsaylı hücumların şahidi olduq. Top uğrunda gərgin mübarizə getdi. Heç nədən, adi səhvlərdən qapımızda iki qol gördük. Fikrimcə, bu oyunda 1 xal qazanmalı idik.
“Bakı” klubunun baş məşqçisi Milinko Pantiç demişdir: “Çox çətin və emosional oyun oldu. Hesabı açsaq da, qol buraxıb fasiləyə bərabərliklə yollandıq. Amma ikinci yarıda yetirmələrim qarşılaşmanı öz xeyrimizə dəyişə bildi. Ardıcıl iki heç-heçədən sonra bu qələbə hava, su kimi lazım idi. Biz məşqçi işi görünən, yaxşı təşkil olunmuş komandaya qarşı döyüşdük. Komandam bu qələbədən sonra yüksək əhval-ruhiyyə ilə “Neftçi” ilə oyuna hazırlaşacaq. “Bakı”nın ən yaxşısı Elxan Əhmədov oldu. Çünki, o, verilən bütün tapşırıqları layiqincə yerinə yetirdi. Səhv etməsi normaldır. Azərbaycan gələcəkdə ondan faydalana bilər”.
Bölmənin digər xəbərləri
