Bakı məktəbliləri arasında “Ekoerudit” breyn-rinq yarışı başlanmışdır
Bakı, 28 fevral (AZƏRTAC). “Əhalinin ekoloji təhsili və maarifləndirilməsi haqqında” Azərbaycan Respublikasının Qanunundan irəli gələn vəzifələri yerinə yetirmək və məktəblilərin ekoloji maarifləndirilməsini genişləndirmək məqsədi ilə Təhsil Nazirliyi Ekoloji Tərbiyə və Təcrübəçilik Mərkəzi, Bakı Şəhəri üzrə Təhsil İdarəsi, ARDNŞ və 46 nömrəli Məktəbdənkənar İş Mərkəzinin təşkilatçılığı ilə Bakı şəhəri məktəbliləri arasında “Ekoerudit” ekoloji breyn-rinq yarışı başlanmışdır.
ARDNŞ-in mətbuat xidmətindən AZƏRTAC-a bildirmişlər ki, yarışın əsas məqsədi gənc nəslin ekoloji maarifləndirilməsi, məktəblilərin ekoloji dünyagörüşünün, ətraf mühitə şüurlu münasibətinin formalaşdırılması və ekoloji mədəniyyətin tərbiyə edilməsidir. “Ekoerudit” ekoloji breyn-rinq yarışı Bakı şəhərinin orta ümumtəhsil və internat məktəblərində, liseylərdə təbiət fənlərinin, məktəbdənkənar müəssisələrin ekoloji dərnəklərinin tədris proqramlarına daxil edilmiş ekoloji mövzular üzrə VIII-XI sinif şagirdləri və dərnək üzvləri arasında 3 mərhələdə keçiriləcəkdir. Seçmə mərhələsi 2012-ci il fevralın sonunda şəhər ümumtəhsil məktəblərinin komandaları arasında keçiriləcəkdir. Martda seçmə mərhələsinin qalibləri arasında yarımfinal, aprel ayında isə final turu keçiriləcəkdir. Seçmə və yarımfinalda daha çox bal toplayan komandalar finalda iştirak etmək hüququ qazanacaqlar. Yarışda komandaların cavabları münsiflər heyəti tərəfindən 5 ballıq sistem üzrə qiymətləndiriləcəkdir.
Final mərhələsində I-III yerləri tutmuş komandalar Təhsil Nazirliyi Ekoloji Tərbiyə və Təcrübəçilik Mərkəzi, Bakı Şəhəri üzrə Təhsil İdarəsi və ARDNŞ-in diplom və qiymətli hədiyyələri ilə mükafatlandırılacaqlar.
Bölmənin digər xəbərləri
