Bakı-Moskva videokörpüsü
Bakı, 26 dekabr, Rafael Həsənov, AZƏRTAC
Dekabrın 26-da ”Rossiya seqodnya” Beynəlxalq Mətbuat Mərkəzində dünya Azərbaycanlılarının Həmrəyliyi Günü münasibətilə Bakı-Moskva videokörpüsü keçirilib.
Videokörpüdə Bakıdan “Həyat” Beynəlxalq Humanitar Təşkilatının sədri, miqrasiya məsələləri üzrə ekspert Azər Allahverdiyev və politoloq Tofiq Abbasov, Moskvadan Ümumrusiya Azərbaycanlılar Konqresinin icraçı direktoru İlqar Hacıyev, Azərbaycan Mədəniyyətinin İnkişafı və Dirçəlişi Fondunun direktoru Şamil Tağıyev iştirak ediblər.
AZƏRTAC xəbər verir ki, tədbirdə Azərbaycan diasporu nümayəndələrinin, habelə Azərbaycan Respublikasının Rusiyada olan vətəndaşlarının və Rusiya Federasiyasının vətəndaşları olan azərbaycanlıların üzləşdikləri ümumi problemlər müzakirə olunub. Bildirilib ki, bu gün əlaqələr iki ölkənin regionları səviyyəsində də müvəffəqiyyətlə və intensiv inkişaf edir. Bu il V Azərbaycan-Rusiya Regionlararası Forumunun keçirilməsi bunun parlaq təzahürü olub.
Bundan əlavə, bütün millətlərin və dinlərin nümayəndələrinin səylərini öz ölkələrində və qlobal dünyada millətlərarası birliyin dəstəklənməsinə yönəltməyin əhəmiyyəti qeyd olunub. Videokörpünün iştirakçıları həmvətənlərimizi Dünya Azərbaycanlılarının Həmrəyliyi Günü münasibətilə təbrik edərək, bu bayramın xalqımız üçün əhəmiyyətini vurğulayıblar.
Bölmənin digər xəbərləri
