BAKIDA ARIÇILIQ MƏHSULLARININ NÖVBƏTİ SƏRGİ-SATIŞ YARMARKASI BAŞA ÇATMIŞDIR
Bakı, 19 noyabr (AZƏRTAC). Noyabrın 9-dan 19-dək Bakıda dənizkənarı Milli Parkda davam etmiş arıçılıq məhsullarının növbəti respublika sərgi-satış yarmarkası başa çatmışdır.
Kənd Təsərrüfatı Nazirliyi heyvandarlıq məhsullarının istehsalı, emalı, damazlıq işi və otlaqlar şöbəsinin müdiri Çingiz Fərəcov AZƏRTAC-ın müxbirinə müsahibəsində demişdir ki, “Arıçılıq haqqında” Azərbaycan Respublikası Qanununa əsasən hər il arıçılıq məhsullarının sərgi-satış yarmarkaları keçirilməlidir. Bu yarmarkaların məqsədi arıçılığı geniş təbliğ etmək, diqqəti bu sahəyə yönəltmək və eyni zamanda yüksək keyfiyyətli arıçılıq məhsulları istehsalını stimullaşdırmaqdır. Hazırda qarşımızda bu vəzifə durur: respublikada arı ailələrinin sayını 500 minə çatdırmaq, ən azı 7 min ton bal istehsalına nail olmaq. Bununla əlaqədar olaraq Kənd Təsərrüfatı Nazirliyi hər il arıçılıq məhsullarının sərgi-satış yarmarkasını keçirir. Builki tədbirə 62 şəhər və rayondan 520 arı təsərrüfatının rəhbəri dəvət olunmuşdu. Ümumilikdə yarmarkada 527 arıçı iştirak etmişdir. Onlar yarmarkaya 700 ton bal, 30 ton vərəmum (propolis), 1 kiloqram arı südü çıxarmışlar. Sərgini 50 minə yaxın adam, o cümlədən xarici qonaqlar ziyarət etmişlər. Bu 10 gündə təqribən 350 ton bal satılmışdır. Yarmarkaya gətirilmiş balın keyfiyyəti diqqətlə yoxlanılmış, satıcılara lazımi şərait yaradılmışdır.
Yarmarka çərçivəsində noyabrın 17-də elmi-praktiki konfrans da keçirilmişdir. Sərgi-satış yarmarkada 143 arıçı ilk dəfə iştirak etmişdir. Onların əksəriyyəti gənc və arıçılıq sahəsində təcrübələri az olduğundan bu konfransın onlar üçün böyük əhəmiyyəti olmuşdur. Konfransa Türkiyə Arıçılar Birliyinin sədri Bəhri Yılmaz da dəvət olunmuşdu. Tədbirdə əsas diqqət damazlıq-seleksiya işlərinin təşkilinə yönəldilmişdi. Xüsusi vurğulanmışdı ki, damazlıq-seleksiya işlərinin əsasını ana arıların yetişdirilib əmtəə təsərrüfatlarına satılması təşkil edir. Hazırda respublikada 21 arıçılıq təsərrüfatı damazlıq işi ilə məşğuldur.
Sərginin işində bəzi qüsurlar da olmuşdur. Bir sıra rayonlardan, xüsusən də Daşkəsəndən və Naxçıvan Muxtar Respublikasından gətirilmiş məhsullar Dövlət Baytarlıq Xidmətinin laboratoriyasında yoxlandıqdan sonra keyfiyyətsiz olduğuna görə yarmarkadan çıxarılmışdır.
Ümumilikdə isə, bu 10 gün arıçıların əsl bayramına çevrilmişdir. Onlar Kənd Təsərrüfatı Nazirliyinə belə tədbirin keçirilməsinə görə təşəkkürlərini bildirmişlər. Alıcılar da razı qalmışlar. Çalışmışıq ki, hamı buradan ekoloji cəhətdən təmiz, keyfiyyətli bal alsın. Ümid edirəm ki, buna da nail olmuşuq.
######
 |
 |
Bölmənin digər xəbərləri
