Bakıda Beynəlxalq Qara Dəniz və Xəzər Dənizi Əməkdaşlıq və Tərəfdaşlıq Fondunun toplantısı keçirilib
Bakı, 23 may, AZƏRTAC
Mayın 23-də Bakıda Beynəlxalq Qara Dəniz və Xəzər Dənizi Əməkdaşlıq və Tərəfdaşlıq Fondunun Baş Assambleyasının və Direktorlar Şurasının 14-cü toplantısı keçirilib.
AZƏRTAC xəbər verir ki, toplantı iştirakçıları əvvəlcə Bakıda çoxmərtəbəli binada baş vermiş yanğın nəticəsində həlak olan insanların xatirəsini bir dəqiqəlik sükutla yad ediblər.
Sonra Fondun prezidenti İsmayıl Safinin Türkiyənin sədrliyi dövründə qurumun gördüyü işlər barədə məruzəsi dinlənilib.
İsmayıl Safi deyib ki, sədrlik dövründə Fond ilə Azərbaycan Respublikasının Beynəlxalq İnkişafa Yardım Agentliyi (AIDA) arasında əməkdaşlıq haqqında memorandum imzalanıb və enerji, mədəni müxtəliflik, təhsil sahələrində birgə layihələrin həyata keçirilməsi ilə bağlı razılıq əldə edilib. 2014-cü ildə Fond ilə Vyana İqtisadi Forumu arasında əməkdaşlığı genişləndirmək məqsədilə görüşlər keçirilib, memorandum imzalanması qərara alınıb.
Diqqətə çatdırılıb ki, Fond Qara dəniz və Xəzər dənizi bölgəsində baş verən hadisələri yaxından izləyir, maraqlı tərəflər arasında dialoqa xüsusi önəm verir. Bu qurum hərbi təcavüz, dövlətlərin ərazi bütövlüyünün pozulması hallarını qətiyyətlə pisləyir. Fond Azərbaycanın, Gürcüstanın, Moldovanın, Ukraynanın ərazi bütövlüyünün bərpasının tərəfdarıdır. Bu ölkələrdə münaqişələrə son qoyulmayana qədər bölgədə sülhdən danışmaq mümkün olmayacaq. Azərbaycan ərazisinin 20 faizi işğal altındadır, bir milyondan artıq insan öz torpaqlarından didərgin düşüb. Təəssüf ki, beynəlxalq təşkilatlar bu problemin həlli istiqamətində qətiyyətlə səy göstərmir.
Vurğulanıb ki, toplantıda qəbul ediləcək Bakı bəyannaməsi Fond tərəfindən bölgədə sülh və əmin-amanlığın dəstəklənməsinə, ölkələr arasında əməkdaşlığın inkişafının təşviqinə yönəlib.
Sonra Fonda sədrlik rotasiya qaydasında Azərbaycan tərəfinə keçib. İsmayıl Safi sədrlik simvolunu qurumun vitse-prezidenti Çingiz Abdullayevə təqdim edib. Çingiz Abdullayev sədrlik müddətində üzərinə düşən vəzifələri tam şəkildə yerinə yetirmək üçün səylə çalışacağını bildirib.
Toplantıda çıxış edən Azərbaycanın xarici işlər naziri Elmar Məmmədyarov ölkəmizin son illərdə əldə etdiyi uğurlar haqqında danışıb. O, dünyada tolerant bir ölkə kimi tanınan Azərbaycanda bütün dinlərin, etnik qrupların nümayəndələrinin sülh şəraitində yaşadıqlarını vurğulayıb. Ölkəmizin mühüm beynəlxalq tədbirlərə ev sahibliyi etdiyini bildirən nazir bu yaxınlarda Bakıda təşkil edilən mötəbər tədbirləri xatırladıb. O, həmçinin bir neçə gündən sonra keçiriləcək “Bakı-2015” ilk Avropa Oyunlarından da bəhs edib.
Elmar Məmmədyarov Azərbaycanın bütün ölkələrlə öz münasibətlərini inkişaf etdirdiyini, beynəlxalq təşkilatlarda fəal iştirak etdiyini bildirib. Azərbaycanın Avropa İttifaqının demək olar ki, bütün üzv ölkələri ilə sıx münasibətlərinin olduğunu bildirən xarici siyasət idarəsinin rəhbəri bu günlərdə Riqada Aİ ilə tərəfdaşlıq haqqında yeni saziş layihəsini təşkilatın rəhbərliyinə təqdim etdiyini xatırladıb. O deyib ki, söhbət bərabərhüquqlu və qarşılıqlı faydalı əməkdaşlıqdan gedir. Postsovet ölkələri Avropa İttifaqı ilə müxtəlif əməkdaşlıq formatlarını seçib. Azərbaycan isə Aİ ilə qarşılıqlı münasibətlərini ikitərəfli formatda qurur.
Azərbaycan Aİ ilə münasibətlərinə ikitərəfli əlaqələr prizmasından baxır. Bu, qarşılıqlı münasibətlərin ən rahat formatıdır. Nazir, həmçinin Azərbaycanın Avropanın enerji təhlükəsizliyinə verdiyi önəmli töhfə barədə də danışıb.
Ermənistan-Azərbaycan, Dağlıq Qarabağ münaqişəsindən danışan E.Məmmədyarov bildirib ki, həlli mümkün olmayan münaqişələr yoxdur. Gec-tez biz bu münaqişəni də həll edəcəyik, çünki bu münaqişə indiki kimi dondurulmuş vəziyyətdə qala bilməz. E.Məmmədyarov bunun üçün dəqiq beynəlxalq hüquqi bazanın olduğunu, o cümlədən BMT Təhlükəsizlik Şurasının dörd qətnaməsinin qəbul edildiyini xatırladıb. Nazir deyib: “Təəssüf ki, Ermənistanın hazırkı rəhbərliyi ilə razılığa gəlmək çox çətindir. Lakin Ermənistan rəhbərliyinə aydın düşüncəli insanlar gələcək və onlar başa düşəcəklər ki, qonşuları ilə yaxşı münasibətlər qurmaq ölkə daxilində uğurlara nail olmaq üçün zəmin yaradır. Ermənistanın hazırkı rəhbərliyinin uğursuz siyasəti bu ölkəni Cənubi Qafqazda həyata keçirilən bütün iri layihələrdən kənarda qoyub”.
Toplantıda Fondun himayəsi ilə aparılan tədqiqatların nəticəsi olan, Qara dəniz və Xəzər dənizi regionlarında həll olunmamış münaqişələrin iqtisadi, sosial və siyasi nəticələri və onların tənzimlənməsi perspektivlərindən bəhs edən “Barışığa aparan yol” nəşrinin təqdimatı olub.
Sonra toplantının bəyannaməsi qəbul edilib.
Xatırladaq ki, qeyri-hökumət və qeyri-kommersiya təşkilatı olan Beynəlxalq Qara dəniz və Xəzər dənizi Əməkdaşlıq və Tərəfdaşlıq Fondu 2009-cu ildə Rumıniyanın paytaxtı Buxarestdə yaradılıb.
Bölmənin digər xəbərləri
