Bakıda K-İnnovasiya Tərəfdaşlığı Proqramı çərçivəsində forum keçirilib
Bakı, 25 oktyabr, AZƏRTAC
Oktyabrın 25-də AMEA-nın Mərkəzi Elmi Kitabxanasında Azərbaycanla K-İnnovasiya Tərəfdaşlığı Proqramı üzrə Elm və Təhsil Nazirliyinin Yüksək Texnologiyalar Parkı (YTP) və Koreya Elm və Texnologiya Siyasəti İnstitutu (STEPI) arasında həyata keçirilən “Azərbaycanda Yüksək Texnologiyalar Parkının istismar proqramı: tətbiq və potensialın artırılması” layihəsi çərçivəsində forum öz işinə başlayıb.
AZƏRTAC xəbər verir ki, forumda çıxış edən STEPI-nin baş elmi işçisi, layihənin koordinatoru Eun Joo Kim STEPI-nin tərəfdaşlığı ilə son 7 ildə 12 ölkə ilə elm, texnologiya və innovasiya siyasəti ilə bağlı məsləhətləşmələr, o cümlədən bacarıqların artırılmasına dair 16 layihənin icra edildiyini bildirib. O, Cənubi Qafqaz regionunda, MDB məkanında Azərbaycanın yeganə ölkə olaraq Koreya Respublikasının bu imkanlarından faydalana bildiyini və ən çox layihə həyata keçirən ölkə statusuna sahib olduğunu söyləyib. Eun Joo Kim STEPI və YTP arasında beynəlxalq texnoloji innovasiyalar üzrə əməkdaşlıq layihəsinin önəminə toxunaraq bildirib ki, layihə çərçivəsində texnoparkın əməliyyat potensialının və rəqabət qabiliyyətinin əsas təlim proqramları vasitəsilə gücləndirilməsi, ölkədə innovativ iqtisadi ekosistemin formalaşdırılması və inkişafına dəstək verilməsi, həmçinin əməliyyat təcrübəsinin artırılması nəzərdə tutulub.
YTP-nin baş direktoru, iqtisad üzrə fəlsəfə doktoru Vasif Abbasov texnoparkın 2017-ci ildən STEPI ilə əməkdaşlıq etdiyini bildirib. O, STEPI ilə birlikdə “Yüksək Texnologiyalar Parkının istismar proqramı: tətbiq və potensialın gücləndirilməsi” layihəsinin icrasına 2022-ci ildə başlanıldığını və 2022-2024-cü illəri əhatə edən layihənin əsas konsepsiyasının təcrübə mübadiləsi və məsləhətləşmələr vasitəsilə Azərbaycan ekspertlərinin bacarıqlarını gücləndirməkdən ibarət olduğunu qeyd edib.
“Layihə çərçivəsində bilik və bacarıqların artırılması, müsbət nəticələrin əldə edilməsi üçün müxtəlif yanaşmalar tətbiq edilmişdir”, - deyən Vasif Abbasov hazırkı layihənin icrası ilə Azərbaycanda insan kapitalının formalaşmasına töhfə verilməsi, Azərbaycan-Koreya elmi, texnologiya və innovasiya əməkdaşlığının genişləndirilməsi, YTP-nin istismar proqramının təkmilləşdirilməsi, biliyin iqtisadi dəyərə çevrilməsi ilə müşahidə olunan texnologiyanın kommersiyalaşdırılması prosesinin daha da inkişaf etdirilməsi istiqamətləri üzrə hədəflərin müəyyənləşdirilməsi nəzərdə tutulub.
Baş direktor Koreyanın tanınmış ekspertlərinin və yerli məsləhətçilərin apardığı təlimlər, eləcə də tətbiq olunan digər metodların YTP-nin və benefisiar qrupda təmsil olunan digər təşkilatların nümayəndələrinin gələcək inkişafına və Koreya-Azərbaycan əlaqələrinin daha da genişlənməsinə töhfə verəcəyini bildirib.
Forumda Koreya Respublikasının Azərbaycandakı səfiri Li İn-Yonq çıxış edərək bu cür tədbirlərin iki ölkə arasındakı elmi-texniki əlaqələrin inkişafında mühüm rola malik olduğunu söyləyib. O, Azərbaycan ilə Koreya arasında 1992-ci ildən qurulan diplomatik əlaqələrin bu gün bir çox istiqamətlər üzrə uğurla inkişaf etdirildiyini diqqətə çatdırıb. İki ölkə arasında bir çox sahələrdə geniş əməkdaşlıq imkanlarının mövcud olduğunu deyən səfir Azərbaycanla Koreya arasında neft sektorunda, informasiya texnologiyaları və bərpa olunan enerji sahələrində, nəqliyyat istiqamətində, eləcə də elm, təhsil, texnologiya sferalarında çoxlu əhəmiyyətli tədbirlərin həyata keçirildiyini bildirib.
YTP-nin icraçı direktoru Zaur Nəhmətov “STEPI və YTP-nin 2023-cü il K-İnnovasiya tərəfdaşlığı” mövzusunda məruzə ilə çıxış edib. O, STEPI ilə YTP-nin əməkdaşlığı çərçivəsində texnologiyaların transferi və kommersiyalaşdırılması və startap-inkubasiya istiqamətində əhəmiyyətli işlər görüldüyünü, bu sahələrdə Koreya təcrübəsinin öyrənildiyini və ölkəmizdə tətbiq olunduğunu diqqətə çatdırıb. Onun sözlərinə görə, elm, texnologiya və innovasiya siyasətinin inkişafı və texnoparkların idarəetmə və istismarına yönəlmiş layihələr çərçivəsində 20-yə qədər onlayn və ənənəvi təlim təşkil edilib. Keçirilən təlimlərdə fundamental və təbiət elmləri üzrə fəaliyyət göstərən elmi müəssisələrin, innovasiya mərkəzlərinin və universitetlərin nümayəndələri koreyalı ekspertlərin təcrübələrindən bəhrələniblər və potensiallarını artıraraq müvafiq sertifikatlara yiyələniblər.
O, həmçinin layihə çərçivəsində bu ilin may ayında YTP-nin İnkubasiya və Texnologiyaların Transferi Mərkəzinin və özəl şirkətin nümayəndələrinin Koreya Respublikasında səfərdə olduqlarını qeyd edib.
Tədbirdə STEPI və YTP-nın fəaliyyətini əks etdirən videoçarx nümayiş olunub.
Forum işini “Koreya məsləhətləşmələrinin nəticəsi və Azərbaycanda tətbiqi” və “Texnologiyaların transferi və kommersiyalaşdırılması platforması vasitəsilə Azərbaycanda innovasiya ekosisteminin təşviqi” sessiyaları üzrə davam etdirib. Sessiyalarda yerli və xarici ekspertlər tərəfindən “Texnologiyanın kommersiyalaşdırılması ekosistemi və dövlət qurumlarının rolları”, “Azərbaycanda texnologiyanın kommersiyalaşdırılması ekosistemi və siyasəti”, “Koreyanın I-Corp Proqramının Azərbaycanda tətbiqi və istifadəsi”, “Yaradıcı İqtisadiyyat və İnnovasiya Mərkəzinin (CCEI) texnologiyaların kommersiyalaşdırılmasına dəstək Proqramı”, “Texnologiyaların Transferi və Kommersiyalaşdırılması Platformasının yenilənməsi” və digər mövzularda məruzələr dinlənilib, müzakirələr aparılıb.
Bölmənin digər xəbərləri
