Bakıda keçirilən seminarda qlobal elmi bazadan effektiv istifadə imkanları araşdırılmışdır
Bakı, 5 noyabr (AZƏRTAC). Noyabrın 5-də Azərbaycan Milli Elmlər Akademiyası, İnformasiya Texnologiyaları İnstitutu və “Thomson Reuters” şirkətinin birgə təşkilatçılığı ilə “Azərbaycanın qlobal elmi bazaya çıxışı” mövzusunda seminar keçirilmişdir.
AZƏRTAC xəbər verir ki, institut rəhbərlərinin, alim və mütəxəssislərin, gənc tədqiqatçıların iştirak etdikləri seminarda çıxış edən AMEA-nın akademik-katibi, İnformasiya Texnologiyaları İnstitutunun direktoru, AMEA-nın müxbir üzvü professor Rasim Əliquliyev qlobal elmi bazaya çıxışın aktuallığından danışmışdır. O, bildirmişdir ki, müasir dövrdə davamlı elmi inkişafın təmin olunması üçün vacib şərtlərdən biri beynəlxalq elmi informasiya məkanına inteqrasiyadır. 2013-cü ilin ölkədə “İnformasiya-kommunikasiya ili” elan olunduğunu vurğulayan R.Əliquliyev demişdir ki, müvafiq tədbirlər planında dünyanın nüfuzlu, yüksək indeksli jurnallarında elmi məqalələrin dərc edilməsinə, bu sahədə əməkdaşlıq əlaqələrinin davamlı inkişafına xüsusi yer ayrılmışdır. İnnovativ elmi nəticələrin əldə olunması baxımından dünya səviyyəsində səmərəli elmi axtarışların aparılmasının vacibliyindən bəhs edən R.Əliquliyev institutun Avropa elmi mühitinə inteqrasiya, müxtəlif xarici elmi-tədqiqat institutları, xüsusən “Tomson Reuters”, “IEEE”, “Springer”, “Elseiver” və digər nüfuzlu təşkilatlar ilə əməkdaşlıq əlaqələrinin genişləndirilməsi istiqamətində görülən işlər barədə ətraflı məlumat vermişdir.
Çıxışında İnformasiya Texnologiyaları İnstitutunda biliklər xəzinəsi üçün texnoloji imkanlar mövzusuna geniş yer ayıran R.Əliquliyev bu zəngin bazadan lazımi informasiyanın əldə edilməsinin mürəkkəb və aktual məsələ olduğunu söyləmişdir. Bu istiqamətdə institutda görülən işlər, əldə olunan nəticələr müsbət qiymətləndirilmişdir.
Qlobal elmi istinad bazasının alimlər və elmi qurumlar üçün təqdim etdiyi imkanlar haqqında danışan “Thomson Reuters”in strateji əməkdaşlıq meneceri Filip Pörnel dünyanın yüzdən çox ölkəsindən 30 milyon tədqiqatçının bu bazaya elmi, iqtisadi və sosial problemlərin həllinə dair mövzularla bağlı müraciət etdiyini bildirmişdir. O, bazadan elmi-tədqiqat, elmi əməkdaşlıq və analitik təhlillər məqsədilə effektiv istifadənin əhəmiyyətini vurğulayaraq qeyd etmişdir ki, bazanın yüksək impakt faktorlu jurnallarının son araşdırmalarına görə, Azərbaycanda aparılan tədqiqatlar, innovasiya fəaliyyəti sürətlə inkişaf edir və bu tədqiqatlara olan istinadlar araşdırmaların qlobal təsirə malik olduğunun göstəricisidir.
Türkiyənin Elmi Texnoloji Araşdırmalar Qurumunun direktoru Ahmet Kaplan “Thomson Reuters”in Türkiyə təcrübəsindən danışaraq bildirmişdir ki, qurum ölkədəki bütün akademik dairələri birləşdirən milli şəbəkədir. Türkiyədə elm və təhsilin keyfiyyətini artırmaq və elmi nəticələri dünyaya çatdırmaq əsas hədəflərdəndir.
“Mikro Bilgi Kayit və Dağitim” şirkətinin layihə və beynəlxalq satış üzrə direktoru Metin Tunc bildirmişdir ki, “Thomson Reuters” elmi tədqiqatların nəticələrini təhlil edərək ölkədə innovasiya fəaliyyətinin, impakt faktorlu və patent nəşrlərin inkişafını göstərən son tədqiqatları təqdim edir. Bu tədbirin də əsas məqsədi Azərbaycanın elm adamlarının həmin bazadan səmərəli istifadəsini təmin etmək, qlobal məkanda rəqabət gücünü artırmaq və elmi potensialını dünya ictimaiyyətinə çatdırmaqdır.
Sonda məruzəçilər çoxsaylı sualları cavablandırmışlar.
Bölmənin digər xəbərləri
