BAKIDA KƏND TƏSƏRRÜFATI MƏHSULLARININ NÖVBƏTİ SATIŞ YARMARKALARI KEÇİRİLMİŞDİR
Bakı, 19 dekabr (AZƏRTAC). Dekabrın 19-da Bakı şəhərinin rayonlarında əvvəlcədən müəyyən olunmuş yerlərdə kənd təsərrüfatı məhsullarının növbəti satış yarmarkaları keçirilmişdir. Şəhər əhalisinin kənd təsərrüfatı məhsullarına tələbatını ödəmək məqsədi ilə keçirilən yarmarkalara, mövsümə uyğun olaraq, əsasən meyvə-tərəvəz məhsulları çıxarılmışdı.
“Təzə bazar” MMC-nin həyətindəki yarmarkaya Sabirabad, Gədəbəy, Hacıqabul və digər rayonlardan geniş çeşiddə məhsul gətirilmişdi. Kənd Təsərrüfatı Nazirliyinin nümayəndəsi Fərhad Qəmbərov bildirdi ki, alıcılara 14,12 ton məhsul, o cümlədən 2 ton ət, 0,3 ton ağartı, 5 ton tərəvəz, 3,5 ton kartof, 3 ton meyvə, 3 min ədəd yumurta təklif olunur. Qiymətlər bazardakından 20-25 faiz aşağıdır. Məsələn, gədəbəyli fermer Arzu Tanrıquliyev yarmarkaya gətirdiyi 3 ton məhsulu (bal, pendir, meyvə, çuğundur, kartof və kələm) münasib qiymətə satır. Ümumiyyətlə, burada qoyun ətinin kiloqramı 4 manat 50 qəpiyə, mal əti 4 manata, kartof, kələm, soğan və alma 30-40 qəpiyə və s. təklif olunurdu.
Bakı Rabitə və Nəqliyyat Kollecinin həyətində təşkil olunan yarmarkada Salyan, Dəvəçi, Qusar, Astara, Quba rayonlarından gətirilmiş müxtəlif çeşiddə bol meyvə-tərəvəz, ət-süd məhsulları, göyərti paytaxt sakinlərinə münasib qiymətlərə satılırdı.
Kənd Təsərrüfatı Nazirliyinin nümayəndəsi Saleh Zərbəliyev dedi ki, fermerlər və şəxsi təsərrüfat sahibləri satışa 84,2 ton məhsul çıxarmışlar. Bu məhsullar arasında ilin bu fəsilində süfrələri bəzəyən mövsümi meyvə-tərəvəz, o cümlədən nar, heyva, alma, mandarin, apelsin, feyxua, əzgil, limon, xiyar, pomidor, balqabaq, yerkökü, kartof, göbələk, göyərti üstünlük təşkil edir. Alıcılara təklif olunan ət və ağartı məhsulları arasında isə mal və qoyun ətləri, kənd toyuğu, yumurta, süd, qatıq, pendir və s. daha çoxdur. Yeni il yaxınlaşdığından bu dəfə yarmarkaya daha çox hind toyuğu, qoz-fındıq, şabalıd gətirilmişdir.
Badamdar qəsəbəsinin mərkəzində, 239 nömrəli məktəbin yaxınlığındakı yarmarkaya Ağdaş, Salyan, Sabirabad, Quba, Şəmkir, Saatlı, Qazax və digər rayonlardan 21 tondan çox kənd təsərrüfatı məhsulu gətirilmişdi. Burada Giləzi və Hacıqabul quşçuluq fabriklərindən isə satışa 9 min 300 ədəd yumurta çıxarılmışdı.
Qusardan kələm gətirmiş Rəhim Muradov məhsulun kiloqramını 20-25 qəpiyə təklif edirdi. Fermer dedi ki, son bir ayda burada 5 tondan çox kələm satmışdır.
Qəsəbə sakini Nadir Qafarov, yarmarkanın daimi müştərisidir. Deyir ki, malların təzəliyindən, qiymətlərin ucuzluğundan razıdır. Yarmarkanın təşkili əhalinin aztəminatlı təbəqəsi üçün böyük qayğıdır.
Metronun “Əhmədli” stansiyasının yaxınlığında, “Azər” ticarət mərkəzində təşkil olunmuş yarmarkada Quba, Ağcabədi, Biləsuvar, Kürdəmir və Qax fermerləri alıcılara 250 tondan çox kənd təsərrüfatı məhsulları təklif edirdilər. Burada meyvə-tərəvəz, bostan məhsulları bazardakından 25-30 faiz ucuz qiymətlərə təklif edirdilər.
Biləcəri qəsəbəsi, Məlik Aslanov küçəsi, 284 nömrəli orta məktəbin yaxınlığındakı yarmarkada fermerlər müxtəlif çeşiddə meyvə-tərəvəzlər, süd məhsulları satırdılar. Şəhər sakinləri Ağsu və Qazaxdan gətirilmiş almanın, kələmin, narın, çuğundurun, kökün, kartofun, pomidorun, qozun və digər məhsulların qiymətlərinin bazardakından ucuz olduğunu bildirirdilər. Burada əhaliyə 17 tonadək kənd təsərrüfatı məhsulları təklif olunurdu.
Binəqədi rayonunda 6 nömrəli Bakı Texniki Peşə Liseyinin qarşısındakı yarmarkada isə satışa Goranboy, Bərdə və Ağstafadan gətirilmiş meyvə-tərəvəz, bostan məhsulları çıxarılmışdı.
Kənd Təsərrüfatı Nazirliyinin nümayəndəsi Fəxrad Eminovun verdiyi məlumata görə, Nərimanov rayonu Ə.Əliyev küçəsindəki yarmarkada şənbə günü Xaçmaz, Tərtər, Salyan, İmişli, Neftçala, Tovuz, Oğuz, Beyləqan, Daşkəsən rayonlarından 29,5 ton məhsul gətirilmişdir. Daşkəsənin Qabaqtəpə kənd sakini Araz Tanarquliyev paytaxt sakinlərinə şəxsi təsərrüfatından 100 kq bal və 0,4 tona yaxın ağartı, Xaçmazın Uzunoba kəndindən Əlisəfa Əsədov isə 2 ton meyvə-tərəvəz təklif edirlər.
Alıcılar məhsulların keyfiyyətindən və qiymətindən razılıq edirdilər.
Nərimanov Rayon İcra başçısının və Kənd Təsərrüfatı Nazirliyinin nümayəndələri yarmarkada qayda-qanuna nəzarət edirdilər.
######
Bölmənin digər xəbərləri
