Baş icraçı direktor: Ən böyük problem qonaqpərvərlik sahəsində ekspertlərin azlığıdır
Bakı, 27 yanvar, AZƏRTAC
Hotellərdə keyfiyyət üzrə konsultasiya sahəsində problemlərin həllinə sistemli şəkildə yanaşırıq. İlk olaraq təbii ki, vəziyyətin şəffaf dəyərləndirilməsi üçün bütün hotellər ulduz təsnifatından keçməlidir. Hazırda bu proses aktiv şəkildə davam edir.
Bunu AZƏRTAC-a müsahibəsində Azərbaycan Hotellər Assosiasiyasının (AHA) baş icraçı direktoru Günay Sağlam deyib.
Növbəti önəmli məqamın isə hotellərdə maarifləndirmə işlərinin mütəmadi aparılması ilə bağlı olduğunu bildirən icraçı direktor qeyd edib ki, hotel əməkdaşları daim müvafiq təlim proseslərinə cəlb olunmalıdır: “Bu sahədə AHA və üzv hotellərimiz bir çox önəmli layihələrə imza atıb. Quba və Lənkəran bölgəsində region hotellər üçün ixtisaslaşmış təlimlər keçirildi və çox müsbət geri dönüşlər aldıq. Bu il də bu layihələr digər regionlarda davam etdiriləcək”.
G.Sağlam vurğulayıb ki, ən böyük problem qonaqpərvərlik sahəsində ekspertlərin azlığıdır. Hotellərin açılışında qeyri-peşəkar istiqamətləndirmə nəticəsində uyğunsuzluqlara yol verilir. Əlbəttə ki, hotelin inşasından açılışına qədər bütün prosesə hotel ekspertlərinin cəlb edilməsi daha uğurlu nəticələrə gətirib çıxarar.
Bölmənin digər xəbərləri
