BDU-da “Erməni yalanları: Tarixdən günümüzə” mövzusunda dəyirmi masa keçirilib
Bakı, 27 aprel, AZƏRTAC
Bakı Dövlət Universitetində (BDU) “Erməni yalanları: Tarixdən günümüzə” mövzusunda onlayn dəyirmi masa keçirilib.
AZƏRTAC xəbər verir ki, dəyirmi masanı açan BDU-nun rektoru Elçin Babayev hər il aprelin 24-də ermənilərin bütün dünyada heç bir tarixi fakta söykənməyən qondarma “erməni soyqırımı”nı “qeyd etdiyini” xatırladaraq, əksinə, tarixi mənbələrə əsasən 1915-ci ildə baş verən hadisələr zamanı məhz ermənilərin silahsız, əliyalın türklərə qarşı divan tutduğunu bildirib. Ümumiyyətlə, hər il aprelin 24-ü öncəsi bu mövzu ətrafında bir ajiotaj müşahidə olunur. Erməni lobbisi təmsil olunduğu ölkələrdə fəaliyyətə keçir, bu saxta tarix ətrafında siyasi “şou” təşkil edir. Dünyanın bir sıra hegemon dövlətləri maraqlarında olduğu üçün, güclü Türkiyə Cümhuriyyətinə qarşı erməni məsələsini, erməni yalanlarını siyasi alət kimi ortaya atırlar. ABŞ Prezidentinin bu ilin aprelin 24-də səsləndirdiyi bəyanatında 1915-ci il hadisələri ilə bağlı tarixi həqiqətləri təhrif etməsi də bir daha dünyanın ikili siyasətini, beynəlxalq hüququ özlərinin maraqlarına qurban verdiklərini təsdiqləyir.
Rektor vurğulayıb ki, hər zaman bir-birinin yanında olan iki qardaş ölkə - Azərbaycan və Türkiyə “erməni soyqırımı”nın uydurma mif olduğunu bütün dünyaya, xüsusilə erməni yalanlarını təzyiq vasitəsinə çevirən dövlətlərə sübut edəcəklər: “Biz hər zaman Türkiyənin mövqeyini dəstəkləyirik və onunla birlikdəyik. 44 günlük Vətən müharibəsində birlikdə olduq, bundan sonra da Azərbaycan və Türkiyə bir-birinin yanında olacaq. Azərbaycan Respublikasının Prezidenti İlham Əliyev müxtəlif görüşlərdə dəfələrlə vurğuladığı kimi, əgər Ermənistan yenidən təxribatlar törətməyə çalışsa, bunun qarşısı qətiyyətlə alınacaq”.
Dəyirmi masada daha sonra Milli Məclisin komitə sədri, BDU-nun kafedra müdiri Ziyafət Əsgərov, Milli Məclisin komitə sədri, BDU-nun kafedra müdiri Hicran Hüseynova, Təhsil Nazirliyi yanında İctimai Şuranın sədri, BDU-nun professoru Şahlar Əsgərov, Milli Məclisin üzvü, BDU-nun professoru Musa Qasımlı, BDU-nun kafedra müdiri Rüstəm Məmmədov, BDU-nun professoru, əməkdar jurnalist Qulu Məhərrəmli, Hüquq fakültəsinin dekanı Əmir Əliyev, BDU tələbələri adından Tarix fakültəsinin tələbəsi Əli Babazadə çıxış ediblər. Çıxışlarda qondarma erməni soyqırımı məsələsinə tarixin öz qiymətini verdiyini, erməni iddialarının, əslində, heç bir fakta əsaslanmadığı bildirilib. ABŞ prezidentinin fikirlərinin heç bir siyasi və hüquqi məna kəsb etmədiyi, qardaş Türkiyəyə siyasi təzyiq vasitəsi olduğu, ancaq bunun heç bir nəticə verməyəcəyi qeyd edilib.
Vurğulanıb ki, həmin vaxt milli və dini mənsubiyyətinə görə minlərlə türk-müsəlman kəndi yandırılıb, on minlərlə dinc sakin qətlə yetirilib. Diqqət yetirsək, görərik ki, bütün bu qırğınların hamısı 1915-ci ilin aprelinə qədər olub, ermənilər tərəfindən türklərə və müsəlmanlara qarşı törədilib. Erməni silahlıları dinc türkləri, müsəlmanları qırıblar, o yerlərdə yaşayan ermənilər hökumət orqanlarına hücum edib, ölkəyə, rəsmi hakimiyyətə qarşı qiyam qaldırıblar. ABŞ prezidenti tərəfindən 1915-ci il hadisələri ilə bağlı aprelin 24-də həqiqətləri əks etdirməyən açıqlamanın verilməsinin təəccüb və təəssüf doğurduğu, qərəzli mövqe sərgilədiyi diqqətə çatdırılıb.
Tədbirdə qondarma erməni soyqırımı ilə bağlı bəyanatın hazırlanması və müxtəlif dillərə tərcümə olunaraq dünyanın aparıcı təhsil müəssisələrinə, beynəlxalq təşkilatlara ünvanlanması, eləcə də erməni yalanlarına akademik səviyyədə qiymətin verilməsi, qondarma soyqırımının elmi əsaslarla ifşa edilməsi, erməni təcavüzləri haqqında sistemli iş aparılması üçün BDU-da İşçi qrup yaradılması haqqında qərar qəbul edilib.
Bölmənin digər xəbərləri
