BDU-da Everesti fəth edən alpinist Vəfa Musayeva ilə görüş olub
Bakı, 29 mat, AZƏRTAC
Bakı Dövlət Universitetində (BDU) Everest zirvəsini (dəniz səviyyəsindən 8848 metr yüksəklikdə) fəth edən azərbaycanlı alpinist, təlimçi və pedaqoq Vəfa Musayeva ilə tələbələrin görüşü keçirilib. Tədbir “BDU könüllüləri” təşkilatının təşəbbüsü ilə reallaşıb.
Bu barədə AZƏRTAC-a BDU-dan məlumat verilib.
Görüşdə çıxış edən BDU-nun rektoru Elçin Babayev bildirib ki, Vəfa Musayevanın dünyanın ən hündür zirvəsini fəth hekayəsi tələbələr üçün maraqlı və bir o qədər təsirlidir. Hədəfə çatmaq uğrunda belə bir əzm nümayiş etdirmək təqdirəlayiq və qürurverici hissdir: “Kosmosdan dünyamıza daxil olan bir meteoritə toxunmaq, bilinməzlikdən gələn bir cismi araşdırmaq necə həyəcanverici və maraqlıdırsa, ən hündürə qalxaraq ilklərdən olmaq da o qədər əvəzsiz duyğudur. Sizin əzminiz orada olduğunuz müddətdə də Azərbaycanda hiss olunurdu. Bu gün tələbələrlə səmimi görüşdə danışdıqlarınız onların həyatına da təsirsiz ötüşməyəcək”.
Daha sonra Vəfa Musayeva Everest zirvəsinin fəthi yolunda keçdiyi mərhələlərdən söz açıb, tələbələrə ilklərdən birinə çevrilməyin tarixçəsini danışıb: “Everesti fəth etmək, əslində, 2016-cı ildən planımda idi. Amma bu günəqədərki dövr planı reallışdırmaq üçün bir növ hazırlıq mərhələsi idi. Son iki ildə artıq Everest özü mənə yaxınlaşmağa başladı. Hədəfim, niyyətim və fikirlərim oldu. Ora qalxana qədər mən müxtəlif idmanlar, məşqlər edir, Azərbaycandakı bir çox dağlara dəfələrlə qalxıb-enirdim və bunların hamısında bir hədəf var idi – Everest. Yanvar ayından etibarən isə azərbaycanlı alpinistlər ilə həm təcrübə, həm də bu yolda mənimlə birgə gedə bilmələri üçün danışmağa başladım. Əsas məsələ özümə inanmağım idi. Zirvəyə gedən yolda ən böyük dəstək özümə verdiyim ürək-dirək idi. “Vəfa, sən bunu bacaracaqsan. Vəfa sən buna qadirsən”, – deyərək qətiyyətlə hədəfimə doğru getdim. Hətta yolun bir hissəsində bələdçim məni ruhdan salmağa çalışsa da, mən fiziki mənada tək olduğum bu yolda inancımla tək olmadığımı hiss etdim. Ora gedəndə əsas məqsədlərimdən biri də bu idi: “Bayrağımı necə olur-olsun, o zirvədə dalğalandırmalıyam”. Zirvədə bayrağımızı açanda, onu buludların üstündə, ən yüksəkdə görəndə ilk dəfə görmüş kimi ağladım. Məqsədimə nail olmuşdum”.
Görüşün sonunda tanınmış alpinist tələbələrin suallarını cavablandırıb.
Bölmənin digər xəbərləri
