BDU-da tədbir: Tarixi torpaqlarımıza qayıdış
Bakı, 7 noyabr, AZƏRYAC
Bakı Dövlət Universitetinin (BDU) Tarix fakültəsi və Yeni Azərbaycan Partiyasının (YAP) Yasamal rayon təşkilatının birgə təşkilatçılığı ilə “Konstitusiya və Suverenlik İli” və 8 Noyabr - Zəfər Gününə həsr olunmuş “Tarixi torpaqlarımıza qayıdış” adlı tədbir keçirilib.
Bu barədə AZƏRTAC-a BDU-dan məlumat verilib.
Əvvəlcə Dövlət Himni səsləndirilib, Vətənimizin ərazi bütövlüyü və suverenliyi uğrunda canlarını fəda etmiş şəhidlərimizin əziz xatirəsi bir dəqiqəlik sükutla yad edilib.
Sonra Tarix fakültəsinin tələbələri tərəfindən Zəfər Günü münasibətilə 3 dildə (Azərbaycan, rus, ingilis) hazırlanmış videoçarx nümayiş etdirilib.
BDU-nun Tarix fakültəsinin dekanı İbrahim Zeynalov son iki əsrlik tariximizin ən böyük Qələbəsi olan 44 günlük Vətən müharibəsinin ölkəmizin ərazi bütövlüyünü təmin etdiyini qeyd edib, bununla dövlət suverenliyimizin tam bərpa edildiyini deyib. O bildirib ki, Prezident, Ali Baş Komandan İlham Əliyevin rəhbərliyi ilə qazanılmış tarixi Zəfər xalqımızı əmin-amanlığa qovuşdurub, Qarabağa əbədi dinclik və xoşbəxtlik gətirib.
YAP Yasamal rayon təşkilatının sədri Bəxtiyar Nəbiyev bildirib ki, bu Qələbə yalnız hərbi zəfərlə yekunlaşmayıb. Ardınca yeni bir mərhələ – Qarabağın və Şərqi Zəngəzurun dirçəlişi, “Böyük Qayıdış” prosesi və regional sülhün qurulması dövrü başlayıb. Son beş ildə bu torpaqlarda həyata keçirilən layihələr, beynəlxalq əməkdaşlıq və diplomatik təşəbbüslər Azərbaycanın qlobal miqyasda nüfuzunu daha da möhkəmləndirib. 2020-ci ildən bəri Qarabağda görülən bərpa işləri misilsiz miqyas alıb: “Prezident İlham Əliyev hələ müharibədən sonra “Biz bu torpaqları dirçəldəcəyik, Qarabağı cənnətə çevirəcəyik” demişdi. Bu gün həmin sözlər gerçək olur”.
YAP Yasamal rayon “Z.Xəlilov küç. 33” (BDU) ünvanı üzrə ərazi partiya təşkilatının sədri professor Zahid Cəfərov tarixi Qələbənin beşilliyi dövründə Vaşinqtonda sülh sazişinin paraflanmasının 44 günlük böyük Zəfərin məntiqi nəticəsi olduğunu vurğulayıb.
Tədbir tələbələrin hazırladığı bədii hissə ilə davam edib.
Bölmənin digər xəbərləri
