BDU-da Türk Dünyası Jurnalistlər Federasiyanın nümayəndə heyəti ilə görüş
Bakı, 25 oktyabr, AZƏRTAC
Bakı Dövlət Universitetinin (BDU) rektoru Elçin Babayevin Türk Dünyası Jurnalistlər Federasiyanın rəhbəri Menderes Dəmirin başçılıq etdiyi nümayəndə heyəti ilə görüşü olub.
Bu barədə AZƏRTAC-a BDU-dan məlumat verilib.
Görüşdə oktyabrın 26-da BDU-da keçiriləcək Azərbaycan xalqının Ümummilli Lideri Heydər Əliyevin 100 illik yubileyinə və Türkiyə Cümhuriyyətinin 100-cü ildönümünə həsr olunmuş III Türk Dünyası Media və Sənət Simpoziumunun açılış mərasiminə hazırlıq işləri müzakirə edilib.
Simpoziumda türkdilli dövlətlərin media və mədəniyyət sahələrində tanınmış xadimləri iştirak edəcəklər. Tədbirin açılış mərasimindən sonra Türk Dünyası Jurnalistlər Federasiyasının təşkilatçılığı ilə Ankarada keçirilən “VIII Türk Dünyası Sənədli Film Festivalı”nda Azərbaycandan mükafat qazanan filmlərin nümayişi olacaq. “Doqquz ölkə, doqquz şəhər, bir festival” şüarı altında keçirilən tədbirdə mükafata layiq görülən filmlərin dünyanın doqquz ölkəsində nümayişi planlaşdırılır. İlk nümayiş məhz Azərbaycanda və onun ən böyük, qədim ali təhsil müəssisəsi olan BDU-da keçiriləcək.
Simpozium iştirakçıları panel müzakirələrdə ümumtürk mədəniyyətinin təbliği, media sahəsində ortaq layihələr, türkdilli dövlətlərdə media birliyinin önəmi kimi mövzulara dair müzakirələr aparacaq, həmçinin BDU-nun Jurnalistika fakültəsinin tələbələri üçün ustad dərsləri keçəcəklər.
Bölmənin digər xəbərləri
