BDU-nun əməkdaşlıq etdiyi xarici ölkə universitetlərindən Azərbaycana dəstək
Bakı, 3 noyabr, AZƏRTAC
Bakı Dövlət Universitetinin (BDU) rektoru Elçin Babayev bu ali təhsil müəssisəsinin əməkdaşlıq etdiyi xarici ölkə universitetlərinin rektorlarına Dağlıq Qarabağ münaqişəsi ilə bağlı məktub ünvanlayıb. Dünyanın 200-dən çox ali məktəbinə ünvanlanan məktubda rektor onların diqqətini Azərbaycanda gedən Vətən müharibəsinə yönəldərək, sentyabrın 27-dən başlayaraq Ermənistan silahlı qüvvələrinin cəbhə xəttində genişmiqyaslı hərbi təxribat törətməsi, Azərbaycanın hərbi mövqelərini və yaşayış məntəqələrini, mülki əhalini ağır artilleriyadan atəşə tutması barədə məlumat verilib. Qadınlar və uşaqlar da daxil olmaqla dinc sakinlər arasında çox sayda ölən və yaralananların olduğu, həmçinin mülki obyektlərə, yaşayış binalarına, müxtəlif tikililərə, o cümlədən maddi mədəni irs nümunələrinə ziyan dəydiyi bildirilib. Ermənistan silahlı qüvvələrinin işğal altında olan ərazilərimizdən dərhal, tam və qeyd-şərtsiz çıxarılmasını tələb edən BMT Təhlükəsizlik Şurasının dörd qətnaməsinin və Qoşulmama Hərəkatı, ATƏT, Avropa Parlamenti, İslam Əməkdaşlıq Təşkilatı kimi nüfuzlu beynəlxalq təşkilatların digər analoji qərarlarının icra edilməsinin və ədalətin bərpa edilməsi üçün beynəlxalq hüququn tam gücünü tətbiq etməsinin zəruriliyi diqqətə çatdırılıb. Məktuba cavab olaraq dünya universitetlərinin rəhbərlərindən Azərbaycanın haqq savaşına dəstək məqsədilə cavab məktubları gəlməkdə davam edir.
Bu barədə AZƏRTAC-a BDU-dan məlumat verilib. Bildirilib ki, Almaniyanın Halle-Vittenberq Martin Lüter Universitetinin rektoru Kristian Tietje və Vaterloo Universitetinin rektoru Hamdullah Pura, Türkiyənin Ardahan Universitetinin rektoru Mehmet Biber və Vyana Diplomatik Akademiyasının direktoru Emil Briks məktub ünvanlayıb. Məktublarda tezliklə Azərbaycanda sülhün yenidən bərqərar olunacağına inam, Bakı Dövlət Universitetinə və Azərbaycan xalqına ən xoş arzular öz əksini tapıb. Həmçinin düşmən Ermənistan silahlı qüvvələrinin hücumu nəticəsində həyatını itirən mülki vətəndaşlara başsağlığı qeyd olunub. Eyni zamanda, Qarabağda baş verən münaqişə ilə bağlı obyektiv məlumatın göndərilməsinə görə BDU-nun rektoruna təşəkkür edilib.
Bölmənin digər xəbərləri
