Ben Uolles Britaniyanın müdafiə naziri vəzifəsini tərk edir
Bakı, 31 avqust, AZƏRTAC
Ben Uolles 2019-cu ilin iyul ayından bəri çalışdığı Böyük Britaniyanın müdafiə naziri vəzifəsindən istefa verib.
AZƏRTAC xəbər verir ki, onun Baş nazir Rişi Sunaka ünvanladığı istefa məktubu hökumətin saytında dərc olunub.
Uolles iyul ayında Sunak tərəfindən planlaşdırılan növbəti kadr dəyişikliyi zamanı kabineti tərk etmək niyyətində olduğunu açıqlayıb. Daha sonra nazir siyasətdən bezdiyini qeyd edib. O, məktubunda həddindən artıq məşğul olduğu üçün həyatının diqqətdən kənarda qoyduğu sahələrinə vaxt ayırmaq və “özü üçün yeni imkanlar kəşf etmək” istədiyini təkrarlayıb.
Ben Uolles əlavə edib: “Müdafiə Nazirliyi dünyanın ən yaxşı adamları ilə yenidən qlobal səviyyəli bir təşkilat olmaq yolundadır”. O, işlədiyi illər ərzində nazirliyin ən müasir səviyyəyə çatmasından və daha yaxşı maliyyələşdirilməsindən qürur duyduğunu vurğulayıb. “Bilirəm ki, Siz də mənimlə razılaşırsınız. Biz müdafiə xərclərinin hökumət tərəfindən istəyə bağlı olduğu və orduya ayrılan vəsaitə qənaət edildiyi dövrlərə qayıda bilmərik. Mən səmimiyyətlə inanıram ki, növbəti onillikdə dünya daha qeyri-sabit və daha az təhlükəsiz olacaq. Həm Sunak, həm də mən müdafiəyə sərmayə qoymağın vaxtı olduğunu düşünürük”, - o əlavə edib.
Bölmənin digər xəbərləri
