BƏRDƏDƏ KƏND TƏSƏRRÜFATI MƏHSULLARININ SATIŞ SƏRGİSİ KEÇİRİLMİŞDİR
Bərdə, 28 noyabr (AZƏRTAC). Böyük Britaniyanın “Oxfam” Beynəlxalq Humanitar Təşkilatının maliyyə dəstəy ilə “Mərkəzi Azərbaycanda Yoxsul Femerlərə Kənd Təsərrüfatında Dəstək” layihəsi həyata keçirilir.
Layihə çərçivəsində “Oxfam” təşkilatının maliyyə dəstəyi və Azərbaycan “Aqrobiznes” Mərkəzinin təşkilatçılığı ilə Bərdədə kənd təsərrüfatı məhsullarının satış sərgisi təşkil olunmuşdur. Mədəniyyət sarayının qarşısındakı meydanda təşkil olunmuş sərgidə 30 nəfərədək istehsalçı tərəfindən 28 adda yem, meyvə-tərəvəz, konservləşdirilmiş meyvə-tərəvəz, süd məhsulları, müxtəlif ağac tinkləri, dekorativ kollar, həmçinin toxum, gübrə və kənd təsərrüfatı texnikası nümaiş etdirilmişdir.
Sərginin açılışında Bərdə Rayon İcra Hakimiyyəti başçısının müavini Məzahir Qasımov, “Oxfam” təşkilatının əməkdaşı Elvin Nəbiyev, “Aran” humanitar regional inkişaf təşkilatının icraçı direktoru Rauf Əliyev çıxış edərək, sərginin keçirilməsinin əhəmiyyətindən danışmışlar. Qeyd olunmuşdur ki, sərginin keçirilməsində məqsəd kiçik fermerlərin bazara çıxışını təmin etmək və təcrübə mübadiləsi aparmaqdır.
Sərgidə nümaiş etdirilən kənd təsərrüfatı məhsullarının satışı da təşkil olunmuş və fermerlərə Aqroinkişaf mərkəzi tərəfindən məsləhətlər verilmişdir.
Bölmənin digər xəbərləri
