Berlin görüşləri Azərbaycanın diplomatik uğurunu nümayiş etdirir - ŞƏRH
Bakı, 21 iyul, AZƏRTAC
Son illərdə Azərbaycanın yürütdüyü fəal və çoxşaxəli xarici siyasət ölkəmizin beynəlxalq aləmdəki mövqeyini əhəmiyyətli dərəcədə möhkəmləndirərək Bakını qlobal diplomatik mərkəzlərdən birinə çevirib. Avropanın aparıcı dövlətləri ilə qurulan qarşılıqlı hörmətə və bərabərhüquqlu tərəfdaşlığa söykənən əlaqələr bu uğurlu xarici siyasət kursunun bariz nümunəsidir. Bu baxımdan, Azərbaycan Prezidenti İlham Əliyevin Berlində Almaniya Prezidenti Frank-Valter Ştaynmayer ilə keçirdiyi geniş tərkibli görüş iki ölkə arasında strateji tərəfdaşlığın keyfiyyətcə yeni mərhələyə qədəm qoyduğunu göstərir. Qlobal geosiyasi gərginliklərin və regional qeyri-müəyyənliklərin hökm sürdüyü bir dövrdə gerçəkləşən bu səfər həm ikitərəfli münasibətlərin dinamikası, həm də Azərbaycan-Avropa İttifaqı dialoqunun gələcək perspektivləri baxımından müstəsna əhəmiyyət kəsb edir.
Bu fikirləri AZƏRTAC-a açıqlamasında Milli Məclisin deputatı Kamran Bayramov deyib.
Onun sözlərinə görə, Bakı ilə Berlin arasında formalaşan dərin siyasi dialoq və qarşılıqlı etimad ikitərəfli əməkdaşlığın miqyasını genişləndirmək üçün möhkəm zəmin yaradır. İki ölkə arasında formalaşan bu strateji tərəfdaşlığın bariz göstəricisi kimi, Prezident Frank-Valter Ştaynmayer müasir dünyada və regionda cərəyan edən mürəkkəb proseslər fonunda Azərbaycanı və Almaniyanı etibarlı sabitlik adaları kimi səciyyələndirib. Almaniyanın dövlət başçısı, həmçinin Azərbaycan ilə Ermənistan arasında sülh gündəliyində əldə olunan irəliləyişi yüksək qiymətləndirərək təbriklərini çatdırıb. Bu mövqe Avropanın aparıcı dövlətlərindən birinin Cənubi Qafqazda dayanıqlı sülhün və təhlükəsizliyin təmin olunmasında Azərbaycanın konstruktiv rolunu yüksək dəyərləndirdiyini və Bakının təşəbbüslərinə verdiyi dəstəyi aydın şəkildə nümayiş etdirir.
“Danışıqların ən vacib şaxələrindən birini enerji təhlükəsizliyi məsələləri təşkil edir. Almaniya Prezidenti ölkəmizin bu sahədəki əvəzolunmaz rolunu xüsusi vurğulayıb. Prezident İlham Əliyev də öz növbəsində Azərbaycanın təchizat coğrafiyasının ildən-ilə genişləndiyini diqqətə çatdıraraq, ölkəmizin artıq Almaniya və Avstriyaya da qaz ixrac etdiyini bildirib. Bu fakt Azərbaycanın Avropa üçün sadəcə xammal tədarükçüsü deyil, eyni zamanda, materikin enerji xəritəsini yenidən formalaşdıran strateji müttəfiq olduğunu bir daha göstərir. Görüşdə, həmçinin Şərqlə Qərbi birləşdirən Orta Dəhlizin potensialı, Avropa Komissiyasının Prezidenti Ursula Fon der Lyayenin Bakı səfərindən doğan Azərbaycan-Avropa İttifaqı işbirliyi və Yaxın Şərqdəki mövcud vəziyyət ətrafında səmərəli fikir mübadiləsi aparılıb”, - deyə deputat əlavə edib.
Kamran Bayramov xatırladıb ki, səfər çərçivəsində, həmçinin “Azərbaycan Respublikası və Almaniya Federativ Respublikası arasında ikitərəfli tərəfdaşlıq üçün strateji gündəliyə dair Birgə Bəyannamə” ilə “Azərbaycan-Almaniya Biznes Şurasının yaradılmasına və fəaliyyətinə dair Birgə Bəyannamə” də imzalanıb. Biznes Şurasının yaradılmasına və fəaliyyətinə dair Birgə Bəyannamə iqtisadiyyat, ticarət, bərpaolunan enerji, sənaye, rəqəmsal transformasiya və logistika sahələrində geniş imkanlar açır.
“Berlinin Bakı ilə münasibətlərə bu cür strateji baxışı Azərbaycanın Avropanın logistika və resurs təminatındakı artan nüfuzunu bir daha təsdiqləyir. Təkbətək və geniş tərkibli görüşlərdən sonra Prezident İlham Əliyev və Almaniyanın Federal Kansleri Fridrix Merts Berlində mətbuat konfransı keçirərək bəyanatlarla çıxış edib, media nümayəndələrinin suallarını cavablandırıblar. Federal Kansler Fridrix Mərtsin Prezident İlham Əliyevlə mətbuat konfransı zamanı səsləndirdiyi “Mən şadam ki, Almaniya ilə Azərbaycan arasındakı münasibətlər çox dinamik şəkildə inkişaf edir” fikri təkcə xoş məram göstəricisi deyil, Bakı ilə Berlin arasında mahiyyətcə yeni tərəfdaşlıq mərhələsinin etirafıdır. Kanslerin vurğuladığı kimi, Cənubi Qafqazda dayanıqlı sabitliyin təmin olunması iki ölkə arasında iqtisadi əməkdaşlığı daha da dərinləşdirmək üçün fundamental imkanlar açır. Bu baxış göstərir ki, Berlin regionda sülhü sadəcə siyasi hədəf kimi deyil, həm də Avropanın iqtisadi və enerji təhlükəsizliyinə xidmət edən strateji zəmin kimi dəyərləndirir”, - deyə Kamran Bayramov diqqətə çatdırıb.
Deputatın fikrincə, bu tarixi səfər Azərbaycanın artıq təkcə Cənubi Qafqazın deyil, Avrasiyanın geosiyasi və geoiqtisadi proseslərində söz sahibi olan etibarlı tərəfdaş kimi qəbul edildiyini bir daha təsdiqləyir. Bununla da, ölkəmiz iqtisadi və siyasi gücü ilə regional çərçivələri aşaraq qlobal miqyasda həlledici aktora çevrildiyini növbəti dəfə nümayiş etdirir.
Bölmənin digər xəbərləri
