BEYLƏQAN RAYONU ƏRAZİSİNDƏ XOCAVƏNDLİ MƏCBURİ KÖÇKÜNLƏR ÜÇÜN SALINMIŞ QƏSƏBƏNİN AÇILIŞI OLMUŞDUR
AZƏRTAC xəbər verir ki, oktyabrın 4-də Beyləqan rayonuna gələn Prezident İlham Əliyev burada Xocavənd rayonundan olan məcburi köçkünlər üçün salınmış 500 ailəlik qəsəbənin açılışında iştirak etmişdir.
Rayon sakinləri, məcburi köçkünlər Prezident İlham Əliyevi və xanımı Mehriban Əliyevanı ehtiramla qarşıladılar.
Baş nazirin müavini, Dövlətqaçqınkomun sədri Əli Həsənov dövlətimizin başçısına məlumat verərək bildirdi ki, bu qəsəbə “Qaçqınların və məcburi köçkünlərin yaşayış şəraitinin yaxşılaşdırılması və məşğulluğun artırılması üzrə Dövlət Proqramı”na əlavələr çərçivəsində inşa edilmişdir. Burada ümumi sahəsi 25885,5 kvadratmetr olan 60 birotaqlı, 245 ikiotaqlı, 180 üçotaqlı və 15 dördotaqlı mənzil vardır. Qəsəbədə 360 şagird yerlik orta məktəb, 50 yerlik uşaq bağçası, poçt şöbəsi, 25 çarpayılıq xəstəxana, klub-icma mərkəzi, baytarlıq məntəqəsi, yanğınsöndürmə deposu, inzibati və anbar binaları da vardır. Yollar, su və elektrik təchizatı lazımi səviyyədədir.
Prezident İlham Əliyev Xocavənd rayonunun Qaradağlı kəndindən olan Sevil Əzizovanın mənzilinə baş çəkdi. Alov və Atəş adlı iki övladı Vətən uğrunda şəhid olan Sevil Əzizova məcburi köçkünlər üçün yaradılan şəraitə görə minnətdarlığını bildirdi.
Mənzillərdə yetərincə şəraitin yaradıldığını vurğulayan Prezident İLHAM ƏLİYEV dedi:
-Gəldik ki, baxaq, şərait necədir. Çox gözəldir, hər şey yaxşıdır.
ƏLİ HƏSƏNOV: İki oğlu şəhid olub. Bu kənddə hər 10 nəfərdən biri şəhid olmuşdur. Bizim günahımızdır ki, bu məsələni qabartmamışıq. Rayon üzrə hər 10 nəfərdən biri şəhiddir.
İLHAM ƏLİYEV: Bunu hamı bilməlidir.
SEVİL ƏZİZOVA: Rayonumuzun döyüşkən camaatı var.
ƏLİ HƏSƏNOV: Ermənilər bir gündə 45 nəfəri qətlə yetirib silos quyusunda basdırmışdılar. Onların arasında Sevil xanımın iki övladı da olmuşdur.
SEVİL ƏZİZOVA: Möhtərəm Prezident, biz analar oğullarımızla fəxr edirik. Oğulları torpağımızı, Vətənimizi, biz anaları qorumaq üçün böyüdürük. Biz onlarla fəxr edirik. Bilirik ki, Sizin siyasətiniz nəticəsində torpaqlarımız azad olunacaq, öz yurd-yuvamıza qayıdacağıq. Ancaq lazım gəlsə, bir oğlum var, onu da şəhidlərimizin qisasını almaq, torpaqlarımızı azad etmək üçün döyüşə göndərməyə hazıram. Bunu bütün şəhid anaları adından deyirəm.
İLHAM ƏLİYEV: Biz çalışırıq ki, məsələni müharibəsiz, sülh yolu ilə həll edək. Amma bununla bərabər, biz bütün başqa variantlara da hazırıq. Biz heç vaxt barışmayacağıq ki, torpaqlarımız işğal altında qalsın. Ya sülh yolu ilə, ya da hərbi yolla torpaqlarımızı azad edəcəyik.
SEVİL ƏZİZOVA: Biz buna inanırıq. Sizin zəhmətinizi, əməyinizi qiymətləndiririk, siyasətinizi bəyənirik və öz minnətdarlığımızı bildiririk. Mehriban xanımın da işini bəyənirik.
Bizə olan diqqət və qayğınıza, hər bir şəhid ailəsinə aylıq müavinətə, yemək xərclərinin, əmək haqlarının, pensiyaların artırılmasına görə biz analar Sizə çox minnətdarıq.
İLHAM ƏLİYEV: Sağ olun. Siz buna layiqsiniz. Mən çalışıram ki, qaçqın-köçkün soydaşlarımızın həyat səviyyəsinin, yaşayış imkanlarının yaxşılaşdırılması üçün nə lazımdırsa, onu edək. Həm proqramlar qəbul edilir, həm də belə gözəl qəsəbələr salınır, binalar tikilir. İndi çadır şəhərciklərinin heç biri yoxdur. Biz hamısını ləğv etdik. Onların yerində belə gözəl evlər tikdik. Siz buna layiqsiniz, daha da böyük imkanlara layiqsiniz və gələcəkdə daha böyük işlər görüləcəkdir.
######
 |
 |
 |
 |
Bölmənin digər xəbərləri
