Beyləqanda tanınmış şair Yusif Nəğməkarın yubiley tədbiri keçirilib
Bakı, 17 oktyabr, AZƏRTAC
Beyləqan Mədəniyyət Mərkəzində yaddaqalan bir ədəbi axşam – Yusif Nəğməkarın 70 illik yubiley tədbiri keçirilib.
AZƏRTAC xəbər verir ki, Beyləqan Rayon İcra Hakimiyyətinin təşkilatçılığı ilə baş tutan tədbiri tanınmış ədəbiyyatşünas, tənqidçi Əsəd Cahangir aparıb.
O, Yusif Nəğməkarın poetik dünyasından, insan mənəviyyatına işıq salan sətirlərindən danışaraq vurğulayıb ki, şairin yaradıcılığı Azərbaycan ədəbiyyatının ruh xəritəsində öz cığırını açıb. Onun misralarında Vətən sevgisi, mənəvi saflıq və xalq ruhunun təntənəsi bədii səmimiyyətlə ifadə olunur.
Beyləqan Rayon İcra Hakimiyyətinin başçısı Əziz Əzizov çıxışında Yusif Nəğməkarın Azərbaycan ədəbiyyatına verdiyi töhfələri yüksək qiymətləndirib. O bildirib ki, Yusif Nəğməkar təkcə bir şair deyil, milli-mənəvi dəyərlərin daşıyıcısı, ədəbi düşüncənin qoruyucusudur. “Onun yaradıcılığı gənc nəsil üçün mənəvi örnəkdir,” - deyə icra hakimiyyətinin başçısı vurğulayıb.
Əziz Əzizov, həmçinin şairin Çanaqqalada Azərbaycan ədəbiyyatını təmsil etməsini böyük qürur hadisəsi kimi dəyərləndirib: “Bu, təkcə Yusif müəllimin uğuru deyil, xalqımızın söz mədəniyyətinin beynəlxalq səviyyədə parlamasıdır”.
Daha sonra Yusif Nəğməkarın ədəbiyyata verdiyi töhfələr və yubileyi münasibətilə ona Beyləqan Rayon İcra Hakimiyyətinin fəxri fərmanı təqdim olunub.
Tədbirdə Yusif Nəğməkarın həyat və yaradıcılıq yoluna həsr olunan videoçarx nümayiş etdirilib. Ardınca ədəbi və elmi ictimaiyyətin tanınmış simaları çıxış ediblər.
Filologiya üzrə fəlsəfə doktoru Adilə Nəzər, Milli Məclisin deputatı Səyyad Aran, filologiya elmləri doktoru, professor Asif Rüstəmli, filologiya elmləri doktoru Mərziyyə Nəcəfova, tibb üzrə fəlsəfə doktoru, Ələsgərşünas Hacı Abbas Bağırov, filologiya üzrə fəlsəfə doktoru Gülnar Səma, şairlər Ağacəfər Həsənli, İmran Güllübulaqlı, Fazil Əsəd, Rövşən Qarabudaq, Rəşidə Allahverdiyeva, Aybəniz İsmayılova, müəllim-tədqiqatçı Etibar Cabbarlı, filoloq Xeyrül Mədətsoylu, tarixçi-alim Atamoğlan Məmmədli, icra hakimiyyətinin nümayəndəsi Yeganə Məmmədova və Etibar İmanov çıxışlarında şairin poetik irsinin bədii özəlliklərindən danışıblar.
Vurğulanıb ki, Yusif Nəğməkar poeziyası xalq ruhunun, milli yaddaşın və müasir düşüncənin vəhdətidir. Onun misralarında sazın ahəngi, Qarabağ torpağının nəfəsi, Beyləqan düzlərinin işığı var.
Görüş zamanı Yusif Nəğməkarın sözlərinə bəstələnmiş mahnılar Beyləqan Rayon Mədəniyyət Mərkəzinin musiqiçiləri tərəfindən canlı ifa olunub. Bu musiqilər sanki şairin misralarını səsə, duyğularını notlara çevirərək zalda həm bədii, həm mənəvi bir harmoniya yaranıb.
Sonra Yusif Nəğməkar çıxış edərək Beyləqan Rayon İcra Hakimiyyətinə, təşkilatçılara və tədbir iştirakçılarına təşəkkürünü bildirib. O, doğma torpağının diqqət və sevgisini həyatının ən önəmli mükafatı kimi dəyərləndirib.
Şairin öz ifasında səsləndirdiyi saz havası tədbirə xüsusi bir doğmalıq və səmimiyyət qatıb, sanki poeziya sazla qoşalaşıb, söz musiqiyə çevrilib.
Tədbirin sonunda iştirakçılar müəlliflə xatirə şəkli çəkdirib, ədəbi görüşün səmimiyyətini bir daha yaddaşa köçürüblər.
Bölmənin digər xəbərləri
